भांगरभूंय | प्रतिनिधी
प्रतिनिधी, पणजी : भोवजन समाजाक आजूनय राज्यांतल्या कांय देवळांच्या गर्भकुडींत प्रवेश दिनात. मुख्यमंत्री डाॅ. प्रमोद सावंत हांणी सनातन धर्माच्या रक्षणा खातीर कटिबद्ध आसा, अशें म्हणलां. तशें जाल्यार भोवजन समाजाक गर्भकुडींत प्रवेश दिवपाचें काम तांणी करचें, असो उलो गोंय प्रदेश कॉंग्रेस समितीचे आदले अध्यक्ष गिरीश चोडणकार हांणी मारला.
डॉ. सावंत सनातन धर्माची राखण करपाक कटिबद्ध आसल्यार बदल घडोवपाक तांणी वावुरचें. गोंयांत ओबीसी, अनुसुचीत जमाती, अनुसुचीत जाती आनी हेरांचो आस्पाव आशिल्ल्या भोवजन समाजाक कांय देवळांच्या गर्भकुडींत प्रवेश दिनात. बहुजन समाजा वांगडा भेदभाव जाता. कॉंग्रेस सगळ्या धर्मांचो आदर करता, अशें तांणी सांगलें.
डाॅ. सावंत हांणी इतिहासाचो अभ्यास करचो आनी गोंयांत भाजपान जातीं, धर्मां मदलो एकवट कसो इबाडला हें जाणून घेवचें. तांणी पयलीं जातीं मदलो एकवट इबाडपी भाजपाच्या इश्ट संघटणांचेर कारवाय करची. भाजप सत्तेर येवचे पयलीं गोंयांत जाती, धर्मां मदल्या एकवटाचेर कसलेच तरेचो ताण नाशिल्लो, अशें चोडणकार हांणी म्हणलें.
बहुजन समाजाक मंदीर प्रवेशाचो अधिकार मेळप ही काळाची गरज. भाजप सरकारान ते नदरेन पावलां उखलचीं, अशेंय तांणी फुडें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
