भांगरभूंय | प्रतिनिधी
आयचे आधुनीक जिणे पद्दतींत जायत्या जाणांक रातच्या वेळार जागें रावपाक आवडटा. रातचें उसरां न्हिदप, सकाळीं उसरां वा पयलींच उठप, न्हिदेचो वेळ अनियमीत जावप, ऑफिसाच्या वेळार बसून काम करप, जेवणाचें प्रमाण, व्यायामाचो उणाव अशे जिणे पद्दतीचे घटक रगतांतली साकर वाडोवंक शकतात. अशा लोकांक गोडेंमूत जावपाचो चड धोको आसता. हे विशीं फोर्टिस-सीडीओसी हॉस्पिटल फॉर डायबिटीस अँड अलायड सायन्सेसचे वरिश्ठ डॉ. अनुप मिश्रा हांणी रातचे जागे रावपी लोकांक जावपी गोडेंमूत, योग्य टायमटेबल खंयचो हे विशीं मार्गदर्शन केलां.
बर्याच जाणांक रातचें जागरण करपाक आवडटा. कांय जाण सांजवेळार चड कार्यक्षम दिसतात. दिसभर डेस्क नोकरी, व्यायामाचो उणाव, न्हीद फावो ती वा अनियमीत नाशिल्ल्यान गोडेंमूत जावपाचो धोको १९ टक्क्यांनी वाडटा. अयोग्य जिणे पद्दत, अनियमितपणाक लागून गोडेंमूत जावपाचो धोको वाडटा अशें डॉ. अनुप मिश्रान म्हणलें.
जागरणां केल्यार गोडेंमूत कित्याक जाता?
कांय जाण रातच्या वेळार चड सक्रीय आसतात, कांय जाण जेवणा उपरांत स्नॅक्स खातात, अयोग्य वेळार व्यायाम करतात वा व्यायाम मात्तूय करिनात, जाका लागून गोडेंमूत जावंक शकता. जांकां सांजेवेळार क्रोनीटायप आसा अश्या लोकाची न्हीद अनियमीत आसता, जाका लागून रगतांतल्या ग्लुकोजाची पातळी सकयल-वयर जावपाक शकता. मेलाटोनिनाचो न्हिदेचेर परिणाम जाता. देखून रातच्या वेळार मोबायल, लॅपटॉप, टिव्ही पळोवप्यांक बेगीन न्हीद येना. तशेंच ताचो परिणाम कोर्टिसोल हार्मोनांचेर जाता. कोर्टिसोल हार्मोन इन्सुलिनाचेर परिणाम करता. इन्सुलिनाचेर जावपी परिणाम रगतांतल्या साकरेचेर परिणाम करता अशें डॉ. मिश्रा हांणी स्पश्ट केलें.
रातची शिफ्ट आशिल्ल्यांनी कितें करचें?
रातच्या वेळार काम टाळप शक्य ना जाल्यार एक-दोन वरां उपरांत भोंवडी करची. पोशक जेवण खावचें. हलकें जेवण खावचें, जंक फूड खावचें न्हय. रातच्या वेळार कोक-थंड पेयां पियेवंक नाकात. व्यायामाक वेळ दिवचें. शक्य आसल्यार सकाळीं वा सांजवेळा नेमान व्यायाम करचो. रातच्या वेळार न्हीद, नेमान आनी योग्य आहार, नेमान व्यायाम केल्यार गोडेंमूत जावपाचो धोको उणो जावंक शकता. दिसाचें काम करपी लोकांकय टायप २ गोडेंमूत जावंक शकता. तशेंच तांचे मदीं व्यायामाचो उणाव, अयोग्य जिणे पद्दत दिसता अशें डॉ. मिश्रान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
