भांगरभूंय | प्रतिनिधी
पणजी, प्रतिनिधी: अंदूंचे विझ राष्ट्रीय मेगा फायनल स्पेल बी सर्तींत गोंयच्या खुबश्या विद्यार्थ्यांनी वांटो घेतलो. हातूंत शारदा मंदीर स्कुलांतलो पयलेक शिकपी रियांश पराशर नायक हांणी तांच्या गटांत दुसरो क्रमांक मेळयलो.
पयली ते णव्वी- धावेच्या वर्गांतल्या विद्यार्थ्यांक आपली गुणवत्ता सिद्ध करपाची संद हे सर्तींतल्यान मेळटा. शारदा मंदिराच्या विद्यार्थ्यां वांगडा गोंयच्या हेर कांय विद्यालयांच्या विद्यार्थ्यांनीय हे राष्ट्रीय सर्तींत वांटो घेतिल्लो. रियांश पराशर नायक हाका पयलो क्रमांक चुकलो, पूण ताची सगळ्या पांवड्यार तोखणाय जाता.
तशेंच शारदा मंदीर स्कुलांतल्या अद्वैत वाडकार (सवो, यत्ता चवथी), आभा सरदेसाय (१३ वी, यत्ता पांचवी), शाश्वत अनुराग (चवथो, यत्ता सातवी) हांणीय हे राष्ट्रीय सर्तींत बरी कामगिरी केल्ल्यान तांचीय तोखणाय जाता.
मुष्टीफंड हायस्कूल, द रोझरी स्कूल, ज्ञान विकास पर्वरी आनी हेर शाळांतल्या विद्यार्थ्यांनी हे सर्तींत बरी कामगिरी केली. णव्वी ते बारावेच्या गटांत मुष्टीफंडच्या सीताराम प्रभू नास्नोडकार हाणें अठ्ठावीसावो क्रमांक मेळयलो. फोंड्याच्या विद्या वृद्धी स्कुलाची सान्वी सिंह आठवेच्या गटांत णव्व्या क्रमांकाचेर आयलें. पयल्या धा क्रमांकाच्या जैतिवंतांक १ ऑक्टोबराक बंगळुरू जावपी सुवाळ्याक इनामां भेटयतले. स्पेलींग कुशळटाय, शब्दप्रयोग, वाक्यरचणूक, ऊच्चार अश्या विशयांचेर विवीध चार पांवड्यांचेर परिक्षा घेवनूच ही सर्त आयोजीत करतात आनी विद्यार्थ्यां मदले गुणवत्तेचो सोद घेवपाक मजत जाता. गोंयच्यानूय हे सर्तींत खुबशे विद्यार्थी राष्ट्रीय पांवड्यार पर्जळटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
