भांगरभूंय | प्रतिनिधी
फोंडें पुलीस स्टेशन सभाघरांत बसका
फोंडें: फोंडें आनी धारबांदोडें म्हालांतल्या भौशीक गणेशोत्सव मंडळाच्या पदाधिकाऱ्यांची बसका काल (बिरेस्तारा) फोंडें पुलीस स्टेशनाच्या सभाघरांत जाली. सुरक्षीततायेचे उपाय म्हूण पदाधिकाऱ्यांक सतर्क रावपाचें आवाहन ह्या वेळार केलें.
उपअधिक्षक आशीश शिरोडकार हांच्या मार्गदर्शना खाला जाल्ले बसकेंत फोंडें पुलीस स्टेशनाचे निरिक्षक तुषार लोटलीकार, म्हाड्डोळ पुलीस स्टेशनाचे निरिक्षक मोहन गावडे आनी कुळें पुलीस स्टेशनाचे उपनिरिक्षक अजय धुरी आनी दोनूय म्हालांतल्या विवीध गणेशोत्सव मंडळाचे पदाधिकारी हाजीर आशिल्ले.
हे संबंदी अदीक म्हायती दितना उपअधिक्षक आशीश शिरोडकार हांणी फोंडें पुलीस स्टेशनाचे शिमेंत आनी म्हाड्डोळ पुलीस स्टेशनाचे शिमेंत दरेकी 14 जाल्यार कुळें पुलीस स्टेशनाचे शिमेंत 1 गणेशोत्सव मंडळाचो आस्पाव आसा. सगल्या माटवांनी सीसीटीव्ही कॅमेरे बसोवपाची सामकी गरज आसा. ते खातीर पदाधिकाऱ्यांक गरजेच्यो सुचोवण्यो केल्यो.
तशेंच हेर म्हायती वा आपत्कालीन वेळार पुलीस कर्मचाऱ्यांची गरज लागत जाल्यार रोखडेंच लागसारच्या पुलीस स्टेशनार संपर्क सादचो. गणेश विसर्जना वेळार येरादारींत बदल करपाची गरज आसल्यार पुलीस स्टेशनार म्हायती दिवची अशें आवाहन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
