वातावरणांत तणाव, पूण वेंचणूक मात शांततायेन

भांगरभूंय | प्रतिनिधी

एनएसयूआय, अभिविप पुरस्कृत पॅनलांचो भोवमत मेळिल्ल्याचो दावो

पणजी : प्रोफेसराक धमकी दिवपी प्रकरण आनी विद्यार्थी संघटणा मदल्या आरोप प्रत्यारोपांच्या प्रकाराक लागून वादांत सांपडिल्ली गोंय विद्यापीठ विद्यार्थी मंडळ वेंचणूक शांतिकायेन पार पडली. विद्यापीठ कॅम्पसांत पुलीस बंदोबस्त आशिल्लो. प्रोग्रेसिव्ह गोवा युनिव्हर्सिटी आनी टुगेदर फॉर युनिव्हर्सिटी ह्या दोनूय पॅनलांनी भोवमत मेळिल्ल्याचो दावो वेंचणुके उपरांत केला.

मतदार वळेरे प्रमाण विद्यार्थी आयले आनी मतदान केलें. मतदान प्रक्रियेक उमेदवार वा हेरांनी कसलोच आक्षेप घेतलो ना, अशें विद्यार्थी कल्याण संचालक (डीएसडब्लू) अँथनी वेगस हांणी वेंचणुके उपरांत सांगलें. वेंचणुके वेळार कॅम्पसांत कसलोच बोवाळ जालो ना अशी म्हायती प्रो. रामराव वाघ हांणी दिली. एनएसयूआय पुरस्कृत प्रोग्रेसिव्ह गोंय युनव्हर्सिटी आनी अभाविप पुरस्कृत टुगेदर फोर युनिव्हर्सिटी हांणी मतमेजणी उपरांत भोवमताचो दावो केला. कार्यकारी मंडळाची वेंचणूक 29 सप्टेंबराक जातली.

प्रोग्रेसिव्ह गोवा युनिव्हर्सिटी पॅनलाक 26 मदले 13 जागे मेळ्ळ्यात. हेर 3 ते 4 प्रतिनिधी आमच्या संपर्कांत आसात. आमचेंच कार्यकारी मंडळ जातलें असो दावो एनएसयुआयचे फुडारी नौशाद चौधरी हांणी केला. दुसरे वटेन टुगेदर फोर युनिव्हर्सिटी पॅनलान भोवमताचो दावो केला. आमच्या पॅनलाचे 18 जाण वेंचून आयल्यात. हातूंत विरोधा विणें आयिल्ल्यांचो आस्पाव आसा. कार्यकारी मंडळ स्थापन करप सहज शक्य आसा, असो दावो अखील भारतीय विद्यार्थी परिशदेन केला.

अखील भारतीय विद्यार्थी परिशद विद्यापिठांत तणावाचें वातावरण तयार करता. सरकाराच्या हस्तक्षेपा उपरांत लेगीत अभाविप पुरस्कृत पॅनलाक एकूय जागो मेळूंक ना. सरकाराच्या हस्तक्षेपाक लागून वेंचणूक रद्द जाल्ली असो आरोप एनएसयुआयचे फुडारी नौशाद चौधरी हांणी केलो.

सिया गांवस, अंबिशा प्रभू, कुलदीप घोरपडे, किरण पार्सेकार, शरण सावळ, किरण नायक, सई नायक, रुद्राक्ष नायक, गणराज गांवस, याधनेश वझरकार, सतेज खांडेपारकार, अमय गांवस, सुहर्श पाडलोस्कार, प्रणीता खानोळकार (विरोधा विणें), सुधांशू नायक (विरोधा विणें), आरोन आंद्राद, दिव्या केरकार, नीलय देसाय (विरोधा विणें), सोफिया मुल्ला (विरोधा विणें), भाग्यश्री नायक (विरोधा विणें), रुशांक नायक, आशुतोश प्रभू, शौनक भांडिये, चेतन बगारिया (विरोधा विणें), रोक्सीटे सिक्वेरा (विरोधा विणें), जेन पेरेरा (विरोधा विणें) हे उमेदवार वेंचून आयले.