भांगरभूंय | प्रतिनिधी
मडगांव: मडगांवच्या एसजीपीडीएच्या ठोक नुस्त्या मार्केटा भायर नुस्तें विकूंक बसपी विक्रेत्यांचेर काल (बिरेस्तारा) सकाळीं पालिका कर्मचाऱ्यांनी कारवाय करून तांकां थंयच्यान धांवडायले. उपरांत नुस्तें विकपी एसजीपीडीए कचेरेंत हाची जाप विचारपा खातीर गेले. दनपारां एसजीपीडीएचे अध्यक्ष आमदार कृष्णा साळकार हांणी विक्रेत्यांचे म्हणणें आयकून घेतले उपरांत न्यायालयाचो आदेश आशिल्ल्यान कारवाय केल्ल्याचें सांगलें. तशेंच हे विशीं कायदेशीर सल्लो घेवन फुडलो निर्णय घेतले अशेंय तांणी स्पश्ट केलें.
मडगांवां एसजीपीडीएच्या ठोक नुस्त्या मार्केटांतले घाण उदक, कोयर, थर्माकोलाच्या बॉक्साक लागून वाठारांत घाण पातळिल्ली. हाका लागून न्हंयचें उदक लेगीत दुशीत जायत आसा. तशेंच रस्त्या कुशीक बसपी नुस्तें विक्रेत्यांक लागून येरादारीक लेगीत आडमेळीं निर्माण जाता. ह्यो सगल्यो गजाली लक्षांत घेवन उच्च न्यायालयान एसजीपीडीएक किरकोळ नुस्त्यांची विक्री करप्यांचेर कारवाय करची. रस्तो येरादारीक आडमेळीं येत आसल्यार विक्रेत्यांक कुशीक काडचे, तशेंच वाठारांत नितळसाण राखपाचे निर्देश दिल्ले.
ते प्रमाण एसजीपीडीए कडल्यान मडगांव पालिकेक हे विशींची कारवाय करपाची मागणी केल्ली. बिरेस्तारा सकाळीं एसजीपीडीए मार्केटा भायर बशिल्ल्या किरकोळ नुस्तें विक्रेत्यांक पालिका कर्मचाऱ्यांनी कुशीक काडले. ह्या वेळार विक्रेत्यांनी पालिका कर्मचाऱ्यां कडेन शाब्दीक वादूय घालो. पूण पालिकेन नोटीस जारी करीत कारवाय केली. मार्केटा भायर बशिल्ल्या नुस्तें विक्रेत्यांक कुशीक काडले. उपरांत नुस्तें विक्रेते एसजीपीडीए कचेरेंत गेले आनी थंयच्या कर्मचाऱ्यांक कारवाये विशीं जाप विचारली.
नुस्तें विक्रेत्यांचो प्रस्न गंभीर जावपाची शक्यताय आशिल्ल्यान दनपारां एसजीपीडीए अध्यक्ष कृष्णा साळकार आनी मडगांवचे आमदार दिगंबर कामत हांणी नुस्तें विक्रेत्यांची भेट घेतली. ह्या वेळार एसजीपीडीए कडल्यान बसकेंत रापणकारांक उसरां मेरेन बसूंक दिवपा विशींचो निर्णय घेतिल्लो. पूण आतां कारवाय करीत आशिल्ल्याचें सांगलें. उच्च न्यायालयाचो आदेश आशिल्ल्या कारणान कारवाय करची पडिल्ल्याचें साळकार हांणी सांगलें.
रापणकारांच्यो बोटी केन्नाय येत आशिल्ल्यान तांकां नुस्तें विकपा खातीर मेकळीक दिल्ली. मार्केट बंद आशिल्ल्यान भायर विक्री करपाची परवानगी त्या वेळार दिल्ली. पूण न्यायालयाच्या निर्देशा प्रमाण आतां कारवाय केल्ल्याचें स्पश्ट केलें. हे विशीं कायदेशीर सल्लो घेतले उपरांत फुडली कारवाय करतले अशें स्पश्ट केलें.
डिसेंबर मेरेन मार्केटाचो पयलो टप्पो जातलो: साळकार
एसजीपीडीएचे सुवातेंत बांदतल्या नुस्त्या मार्केटाच्या पयल्या टप्प्यांतलें काम डिसेंबर मेरेन पुराय करतले. तें काम पुराय जाले उपरांत नुस्तें विक्रेत्यांचो प्रस्न उप्रासचो ना. तांकां थंय सुवात उपलब्ध करून दितले. केंद्रा कडल्यान मेळिल्ल्या निधींतल्यान मार्केटाचें बांदकाम जायत आसा. विक्रेत्यां खातीर चडांत चड सुवात उपलब्ध करपा खातीर यत्न करतले अशेंय एसजीपीडीए अध्यक्ष कृष्णा साळकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
