भांगरभूंय | प्रतिनिधी
मुख्यमंत्री: बायलांनी तयार केल्ले पदार्थ घरा येतलें मागोवंक
म्हापशें: बायलांच्या बचत गटांनी तयार केल्ले पदार्थ आनी उत्पादनां मोबायल अॅपाच्या माध्यमांतल्यान घरा बशिल्ले कडेन मागोवंक येतलें. हाका लागून चवथी खातीर प्रायोगीक तत्वाचेर ई मार्केटाची सुरवात आयज सावन जाता अशी घोशणा मुख्यमंत्री डॉ. प्रमोद सावंत हांणी केली.
काल (बिरेस्तारा) रेईश मागूl पंचायतीच्या नव्या तीन माळ्याच्या पंचायत घराचें उक्तावण केले उपरांत मुख्यमंत्री उलयताले. आठ म्हयन्यांत ही पंचायत वास्तू उबी केली.
ह्या वेळार माचयेर मंत्री गोविंद गावडे, आमदार केदार नायक, आदले आमदार जयेश साळगांवकार, जिल्हो पंचायत वांगडी संदीप बांदोडकार, सरपंच सुश्मिता पेडणेंकार, पंच वांगडी सुभाष पेडणेंकर आनी हेर पदाधिकारी हाजीर आशिल्ले.
ही स्वयंपूर्ण ई-मार्केटाची संकल्पना फक्त चवथी पुरतीच मर्यादीत उरची ना. बायलां बचत गट आनी हेर उत्पादनां अॅपा वरवीं पावोवपाची संकल्पना साकारून बायलांक प्रोत्साहन दितली. ह्या ई-मार्केटाचो विस्तार सुरवातेक गोंयांत आनी कालांतरान गोंया भायर व्हरपाचो विचार आसा अशें मुख्यमंत्री डॉ. प्रमोद सावंत हांणी म्हणलें.
दरेक पंचायत वांगड्यां मदीं इत्साशक्त आनी विकासकामां करपा खातीर तळमळ आसूंक जाय. तेच प्रमाण आपल्या पंचायतींतल्या लोकांचो विकास जावचो हे खातीर विवीध उपक्रम आनी प्रशिक्षण राबोवन नाविन्यपूर्ण कुशळटाय विकास कार्यशाळा राबोवची अशें अवाहन मुख्यमंत्री डॉ. सावंत हांणी केलें.
गांवांतली पंचायत ही फक्त मुळाव्यो सुविधा उबारपी माध्यम आसून पंचायतीन मनीस संसाधन निर्मिती करपी माध्यम तयार करचें. सद्या गोंय सरकारा कडल्यान विवीध कुशळटाय विकास उपक्रम राबयतात अशेंय मुख्यमंत्र्यानी म्हणलें.
आमदार केदार नायक हांणी म्हणलें, लोक कल्याणा खातीर सरकाराचो सदांच तेंको आनी सहकार्य मेळ्ळां. ह्या पंचायत घरा खातीर लोकांनी दाखयिल्लो संयम आनी सहकार्या विशीं तांणी सगल्यांचे उपकार मानले. मंत्री गोविंद गावडे, जिल्हो पंचायत वांगडी संदीप बांदोडकार, पंच वांगडी सुभाष पेडणेंकार हांणीय आपलें मनोगत उक्तायलें.
मजगतीं, ह्या वेळार डॉ. विनोद साळकार, प्रा. डॉ. सिल्वानो सिल्वा डायस, आदले पुलीस अधिक्षक अॅलन डिसा, पुलीस उपअधिक्षक तुषार वेर्णेंकार, उजो पालोवपी दळाचे अधिकारी बॉस्को फेर्रांव, आग्नेलो फर्नांडीस, विष्णूदास आर्लेंकार, वेरें गणेशोत्सव मंडळ, गौरश साळगांवकर आनी हेरांचो मुख्यमंत्र्या हस्तुकीं समाजा खातीर दिल्ल्या योगदाना खातीर तांकां शाल, श्रीफळ आनी यादस्तीक भेटावन भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
