भांगरभूंय | प्रतिनिधी
पणजी, प्रतिनिधी: सर्वोच्च न्यायालयान फोग लावपाक आनी जनावरां आड क्रुरतायेक प्रतिबंध करपाचे एके याचिकेचेर दिल्ल्या आदेशा प्रमाण सरकारान चवथ, दिवाळी ह्या सारख्या परबांच्या दिसांनी रातचीं ८ ते १० ह्या वेळार फोगाचो वापर करपाक प्रतिबंध लागू केला.
तशेंच नातलां/ नव्या वर्साच्या प्रसंगार रातचीं ११.५५ ते १२.३० वरां मेरेन फोग लावपाक प्रतिबंध आसतलो. बेरियम सॉल्ट वापरिल्ल्या तशेंच एकठांय जोडिल्ल्या फोगाचेर बंदी आसा. खंयच्याय राज्यांतल्या वाठारांत बंदी आशिल्लो फोग विकपाक, तयार करपाक वा वापरपाक मेळचो ना. हे आदेश पाळूंक ना जाल्यार संबंदीत राज्यांतले पुलीस यंत्रणेक जापसालदार धरतले.
सध्या चवथ लागीं पावल्या. ह्या काळांत सर्वोच्च न्यायालयाच्या आदेशाक पाळो दिवपाची गरज आसा. फोगाचो अकस्मात व्हड आवाज जाल्ल्यान पाळीव तशेंत हेर हेडगीं जनावरां भितात आनी आबूज जावन मेळत ते वटेन धांव मारतात. तशेंच जाण्ट्यां आनी दुयेंत मनशांकय फोगाचो आवाज आनी वासान त्रास जाता. फोगाग लागून हवेंत प्रदुशणय वाडटा आनी ताचो मनशाचे भलायकेचेर वायट परिणाम जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
