भांगरभूंय | प्रतिनिधी
पेडणें, प्रतिनिधी: मोरजेच्या सरपंच पदार मुकेश गडेकार हांची विरोधा विणें नेमणूक जाली.
पंदरा दिसां पयलीं तोंडी कबलाती प्रमाण सरपंच सुरेखा अमीत शेट गांवकार हांणी सरपंच पदाचो राजिनामो दिल्ल्यान हो जागो रितो आशिल्लो. ताका लागून पंचायत मंडळाची बसका आयज १४ सप्टेंबराक आयोजीत केल्ली. हे बसकेंत सरपंच पदा खातीर वेंचणूक जाली. तेन्ना मुकेश गडेकार हांचो सरपंच पदा खातीर एकूच अर्ज आयलो. ह्या वेळार आदली सरपंच सुरेखा अमित शेटगांवकार, पंच रजनी शिरोडकार, पंच सुप्रिया पोके, पंच मंदार पोके, पंच विलास मोरजे, पंच फटु शेटगांवकार, उपसरपंच पवन मोरजे आनी हेर हाजीर आशिल्ले.
पंचायत मंडळान एका वर्सा खातीर सरपंचपद वाटून घेतलां. सुरवातेक सुरेखा शेटगांवकार हाची नियुक्ती जाली. उपरांत आतां मुकेश गडेकार हांकां सरपंच पदाची संद दिली. गडेकार हांणी सरकारा वरवीं आपूण सगळ्या प्रभागांची उदरगत करपाक यत्न करतलों आनी आपल्याचेर जो विस्वास दाखयला ताका आपूण पात्र थारतलों, अशें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
