भांगरभूंय | प्रतिनिधी
पणजी, प्रतिनिधी: खेळा प्रशिक्षकांनी प्रशिक्षण दिवपा कडेन आडनदर केलें वा तांचें कामा कडेन दुर्लक्ष जाता आसत, जाल्यार तांकां सरळ निलंबीत करतले, अशी शिटकावणी खेळा मंत्री गोविंद गावडे हांणी दिल्या.
तांणी आयज पेडें खेळां संकुलाक भेट दिली. खेळां मैदान तशेंच हेर वेवस्थेची पळोवणी केली. उपरांत पत्रकारां कडेन उलयतना तांणी ही शिटकावणी दिली. कांय प्रशिक्षक येतात आनी सय करून वतात, अशें एकल्यान खेळा मंत्रांक सांगलें. म्हजे कडेन अजुन अशी कागाळ येवंक ना. कागाळ आयली, जाल्यार हांव आकस्मिक भेट दिवन पळोवणी करतलों. तो जर कामार दिसलो ना, जाल्यार तांचेर निलंबनाची कारवाय जातली, अशे श्री. गावडे हांणी स्पष्ट केलें.
गोंयांत ऑक्टोबरांत राष्ट्रीय खेळा सर्त जावपाची आसा. सर्तीची तयारी योग्य तरेन सुरू आसा, अशें तांणी सांगलें. राष्ट्रीय खेळा सर्ती खातीर निविदा जारी करपाची प्रक्रिया सुरू जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
