भांगरभूंय | प्रतिनिधी
फोंडेच्या एका विद्यार्थ्याचो मोबायल जप्त, दीसभर चवकशी
पणजी, प्रतिनिधी: सध्या राष्ट्रीय तपास यंत्रणेन (एनआयए) उत्तरप्रदेश, झारखंड आनी हेर राज्यांनी देशा आड कारवायो जाल्ल्याचें कळटांच सोद मोहीम सुरू केल्या. राष्ट्र विरोधी वावरांत वांटो घेवपी लोकांचो नेटान सोद घेवन तांचेर कारवाय करप चालू आसा. हे मोहिमेंत गोंयांतूय कांय अशे लोक आशिल्ल्याचो वास लागिल्ल्यान एनआयएचे अधिकारी सध्या गोंयांत आयल्यात. तांणी आयज (१४ तारखेक) सकाळीं फोंडें म्हालांत धावे यत्तेंत शिकपी नेण्ट्या चल्याची चवकशी सुरू केली. ताचे कडल्यान एनआयएच्या अधिकार्यांनी मोबायल जप्त केला. एनआयएन हे चवकशे खातीर फोंडें पुलिसांचो आदार घेतलो.
मजगतीं, हे मोहिमे खाला काल बुधवारा एनआयएन लखनौचें एक घर ‘आतंकवादी कारवाय’ केंद्र घोशीत केलां. चवकशे उपरांत हे मालमत्तेचो वापर प्रतिबंधीत संघटनेच्या अल- कायदा कडेन संबंदीत आशिल्ल्या अन्सार गजवत- उल- हिंद संघटनेच्या वांगड्यांनी केल्ल्या तपासांत कळून आयलां. ह्या घरांत आतंकवादी हल्ले करपाची तयारी सुरू आशिल्ली. उत्तर प्रदेशांत आतंकवादी हल्ले करपाच्या पंगडांतलो एक भाग म्हणून आरोपी मिन्हाज अहमद, लखनवच्या दुबग्गा हांगा आशिल्ल्या घराचो वापर दहशतवादी आनी पेट्रोल बॉम्ब करपा वांगडा विवीध बेकायदेशीर कामां खातीर करतालो, अशें एनआयएन म्हणलां.
मजगतीं, झारखंडांतूय आतंकवाद्यां आड एनआयएची कांय म्हयन्यां सावन सोद मोहीम सुरू आसा. तशेंच दिल्लींत जी २० परिशदे पयलीं दिल्ली मेट्रोच्या ५ स्टेशनांचेर भारता आड आनी खलिस्तान समर्थक पोस्टर्स विशीं कालूच एक नवी अपडेट मुखार आयल्या. ह्या प्रकरणांत एनआयएक हिंसाचार पातळावपी ४५ मदल्या १५ खलिस्तानींची वळख पटल्या. ताचोय सोद घेवप चालू आसा.
तशेंच एका प्रकारणाचो तपास चालू आसतना एनआयएक गोंय कनेक्शन आशिल्ल्याचें दिसून आयलें. ताका लागून एनआएचे अधिकारी गोंयांत दाखल जाल्ले. तांणी एका विद्यार्थ्याची सकाळ सावन तपासणी, चवकशी केली आनी सोशियल मिडिया वापरपी त्या चल्याचो मोबायल जप्त केलो. तो मुळचो उत्तर प्रदेशाचो. फाटलीं धा वर्सां सावन ताचें कुटुंब गोंयांत रावता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
