भांगरभूंय | प्रतिनिधी
8 म्हयन्यांत 892 जाणांक सुण्यांनी मारलो घांस
फोंडें: फोंडें वाठारांत रस्ताद सुणीं वाडिल्ल्यान लोकांक त्रासदायक थारूंक लागल्यांत. रस्ताद सुण्यांनी घांस मारपाचे प्रकारूय फोंडें वाठारांत वाडत आसात. सुण्यांनी घांस मारिल्ल्या दुयेंतींचेर फोंडेंच्या उपजिल्हो हॉस्पिटलांत उपचार करतात. फाटल्या कांय म्हयन्यां सावन सुण्यांनी घांस मारपाच्या प्रकरणांनी सुमारा भायर वाड जाल्या. फोंडेंच्या उपजिल्हो हॉस्पिटलांत म्हयन्याक सरासरी 100 दुयेंतींचेर उपचार करतात. ताका लागून रस्ताद सुणीं वाडिल्ल्यान लोकां खातीर तीं घातक थारूंक लागल्यांत.
फोंडें वाठारांतल्या शांतीनगर, सांता क्रुझ, वारखंडे, खडपाबांध, तिस्क – फोंडें, वयलो बाजार, नुस्त्या मार्केट, पंडितवाडो आनी हेर सुवातांनी व्हड प्रमाणांत रस्ताद सुणीं वाडिल्लीं दिसून येतात. कुर्टी पंचायत वाठारांतल्या हावसिंग बार्ड वाठारा रस्ताद सुणीं वाडिल्ल्यान अदीक घातक जाला. रातच्या वेळार वाठारांत यो-वच करपी खूबश्या अनवळखी लोकांक रस्ताद सुण्यांनी घांस मारल्यात. ताका लागून वाठारांत रातच्या वेळार रस्त्या वयल्यान भोंवप लेगीत घातक जालां.
फोंड्यां उपजिल्हो हॉस्पिटलांत जानेवारी – 114, फेब्रुवारी -130, मार्च – 130, एप्रील – 125, मे – 163, जून – 95, जुलय -53 आनी ऑगस्ट म्हयन्यांत 82 जाणांचेर सुण्यांनी घांस मारिल्ल्या दुयेंतींचेर उपचार केले. वट्ट आठ म्हयन्यांत 892 जाणांक सुण्यांनी घांस मारले उपरांत उपजिल्हो हॉस्पिटलांत उपचार घेतिल्ल्याची नोंद जाल्या. हॉस्पिटलांत सुण्यांनी घांस मारिल्ल्या दुयेंतीक पांच इंजेक्शनां घवचीं पडटात. हॉस्पिटल पयल्या दिसा, तिसऱ्या दिसा, सातव्या दिसा, पंदराव्या दिसा आनी एकविसाव्या दिसा इंजेक्शन दिता.
गुरुदास नायक ह्या तरणाट्यान फोंडें वाठारांतल्या विवीध हायस्कुला कुशीक रस्ताद सुणीं वाडिल्ल्याचें सांगलें. विद्यार्थी टिफिनांत उरिल्लें पदार्थ भायर उडयत आशिल्ल्यान रस्ताद सुण्यांच्या पोटाचो प्रस्न सुट्टा. पूण विद्यार्थ्यांक रस्ताद सुण्यांचो त्रास सोंसचो पडटा. कांय लोक सुण्याचीं पिलां शारांत हाडून सोडटात. ताका लागून रस्ताद सुण्यांचे संख्येंत वाड जातना दिसून येता. लोकांनी घरा पोशिल्ल्या सुण्यांची जतनाय घेतना सुण्याचीं पिलां हेर सुवातांनी सोडची न्हय अशेंय ताणें मुखार उलयतना म्हणलें.
खूबशे जाण प्लास्टीक पोतयांनी भरून ओलो कोयर रस्त्याचे कुशीक उडयतात. तो ओलो कोयर खावपा खातीर रस्ताद सुण्यांची संख्या वाडत आशिल्ल्याचें दिसून येता. लोकांनी स्वता जापसालदारकी स्विकारून ओलो कोयर रस्त्याचे कुशीक उडोवपा बदला कोयराचो स्वता विलो लावपाची गरज आशिल्ल्याचें प्रताप देसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
