तुयें इलेक्ट्रॉनिक्स सिटी प्रकल्प आडकलो
भांगरभूंय | प्रतिनिधी
पेडणें, प्रतिनिधी: तेन्नाचे मुख्यमंत्री लक्ष्मीकांत पार्सेकार हांणी दुरदृश्टी दवरून तुयेंचे सरकारी लिजचे जमनींत इलेक्ट्रोनीक सिटी प्रकल्प उबारपाचो यत्न केलो. ह्या प्रकल्पाक मान्यताय मेळ्ळी. पूण फाटल्या सात वर्सां सावन ह्या प्रकल्पाची योग्य तरेन फाटपुरवण जायनाशिल्ल्यान आदले मुख्यमंत्री प्रा. लक्ष्मीकांत पार्सेकार हांणी हुस्को उक्तायलो.
पेडणें म्हालांतले तरणाटे व्हडा प्रमाणांत विवीध मळांचेर शिक्षण घेतात. इलेक्ट्रॉनीक, आयटी मळार अभियंते जातना तरणाट्यांक बर्या पगाराच्यो नोर्यो म्हालांतूच मेळपा खातीर बरे उद्देग इलेक्ट्रॉनिक्स सिटींत हाडपाचो मनोदय पार्सेकार हांणी उक्तावन तांणी तुयां इलेक्ट्रॉनीक सिटी प्रकल्पाक मान्यताय दिली. ही येवजण तांणी आखली पूण तांचे उपरांत वेंचून आयिल्ल्या लोकप्रतिनिधीन ही इलेक्ट्रॉनीक सिटी कार्यरत करूंक ना.
सात वर्सां पयलीं देशाचे प्रधानमंत्री नरेंद्र मोदी हांचे हस्तुकीं ऑनलायन पद्धतीन इलेक्ट्रॉनिक्स सिटीचें भुमीपुजन केल्लें. ह्या सात वर्सांनी हांगा फकत रस्तोच जाला. ह्या रस्त्याची वेवस्था आजूनय सरकारान करूंक ना. प्राचार्य पार्सेकार हांणी राष्ट्रीय महामार्ग रस्तो मंत्री नितीन गडकरी हांचे कडेन चर्चा करून धारगळ सुके कुळण ते इलेक्ट्रॉनीक सिटी मेरेनच्या लिंक रस्त्या खातीर उलोवप सुरू केल्लें. येवजणूय आखिल्ली. पूण ताची आजूनय कार्यवाय जायनाशिल्ल्यान हो प्रकल्प आडखळून पडला.
हो प्रकल्प जावचे खातीर स्वता पार्सेकार हांणी बरेच यत्न केल्ले. उपरांत रोखड्योच वेंचणुको आयल्यो. वेंचणुकेच्या काळांत मतदारांनी लोकप्रतिनिधी बदल्ले. प्राचार्य पार्सेकार हांचे उपरांत सोपटे आमदार जाले. सोपटे उपरांत जीत आरोलकार हांकां संद दिली. सरकाराची प्रक्रिया म्हणून ह्या दोनूय उमेदवारांनी हो प्रकल्प फुडें व्हरपाची गरज आशिल्ली. ह्या दोगूय प्रतिनिधींनी यत्न केले. पूण तांकां येस मेळना. ताका लागून हो प्रकल्प आडखळून पडला.
ह्या प्रकल्पाची पळोवणी आयटी मंत्री, चेअरमन, उपाध्यक्ष, आमदार, सरपंच खुबश्या जाणांनी केली. पूण ताची कार्यवाय कोण करतलो? असो प्रस्न मुखार येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
