भांगरभूंय | प्रतिनिधी
पणजी ः म्हादय अभयारण्याक तीन म्हयन्यां भितर ‘वाग वाठार’ म्हूण अधिसुचित करपाच्या उच्च न्यायालयान दिल्ल्या आदेशाक राज्य सरकारान सर्वोच्च न्यायालयांत आव्हान दिलां. हे संबंदी सरकारान सर्वोच्च न्यायालयांत खाशेली याचिका दाखल केल्या.
‘वाग वाठार, गोंयांत नाकाच’ अशी भुमिका धा दिसां आदीं वन्यजीव मंडळान घेतिल्ली. पूण, मुंबय उच्च न्यायालयाच्या गोंय खंडपिठान 24 जुलयाक राज्य सरकाराक ३ म्हयन्यांत म्हादय अभयारण्याक ‘वाग वाठार’ म्हूण अधिसूचित करचे असो आदेश दिल्लो. तेच बरोबर उच्च न्यायालयाच्या ह्या आदेशाक सर्वोच्च न्यायालयांत आव्हान दितले अशें राना मंत्री विश्वजीत राणे हांणी जाहीर केल्लें. ते प्रमाण आतां सरकारान सर्वोच्च न्यायालयांत खाशेली याचिका दाखल केल्या.
गोंय फावंडेशनान उच्च न्यायालयांत याचिका दाखल करून म्हादय अभयारण्य आनी ताच्या भोंवतणच्या वाठाराक ‘वाग वाठार’ म्हूण अधिसुचित करपाची मागणी केल्ली. ताचेर राज्य सरकारान फुडल्या तीन म्हयन्यांत म्हादय अभयारण्य आनी ताचे भोंवतणचो वाठार वाग वाठार म्हणू अधिसुचित करचो. वागांच्या सुरक्षे खातीर आराखडो तयार करचो. थारायिल्ल्या काळा भितर ताका मान्यताये खातीर केंद्रीय वाग संरक्षण प्राधिकरणाक धाडचो. ते उपरांत प्राधिकरणान बेगीनांत बेगीन मान्यताय दिवची अशें उच्च न्यायालयान निर्देश दिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
