भांगरभूंय | प्रतिनिधी
चिखले हॉस्पिटलांत लोकांची रांग
वास्को: डेंग्यू बरोबर थंडी, खांक हीं दुयेंसां जाल्ल्या दुयेंतींची संख्या वाडत आशिल्ल्यान चिखली उपजिल्हो हॉस्पिटलांत व्हड प्रमाणांत दुयेंती उपचारा खातीर येवंक लागल्यात. ताका लागून थंयचे दोतोर, नर्स तशेंच हेरांचेर व्हड प्रमाणांत ताण येवंक लागला. ह्या प्रकरणांत हॉस्पिटलाचे मुखेल वैजकी अधिकारी डॉ. अनील उम्रास्कार हांणी सांगलें की, येत्या कांय दिसांनी परिस्थिती बदलपाची शक्यताय आसा. डेंग्यूचे दुयेंती उणें जावपाची शक्यताय आसा.
सरकारी हॉस्पिटलांत बरे उपचार जायत आशिल्ल्यान चडांत चड दुयेंती आतां चिखली उपजिल्हो हॉस्पिटलांत दाखल जायत आसात. ताका लागून दुयेंतींची संख्या दिसान दीस वाडत आसा. हें सकाळच्या वेळार रजिस्टर कावंटरा मुखार लागिल्ली बायलांची, दादल्यांची आनी ज्येश्ठ नागरिकांचे रांगे वयल्यान दिसून येता.
कावंटर जरी 9 वरांचेर उक्तो जायत आसलो तरी दुयेंती, तांचे सोयरे सकाळीं सात-आठ वरांचेरूच रांगेंत उबे राविल्ले दिसून येतात. ताका लागून कावंटर वेळार उक्तो जावपाची गरज आसता. थंयचो एखादो कर्मचारी रजेर आसत जाल्यार थंय हेर कर्मचार्याची त्या दिसा खातीर नेमणूक करपाची गरज आसता. जेणे करून दुयेंतींक चड करून चड दुयेंत आशिल्ल्या ज्येश्ठ नागरिकांक त्रास सोंसचो पडचो ना.
वाडिल्ल्या दुयेंतींचे संख्या विशीं डॉ. अनील उम्रास्कार हांचे कडेन चवकशी केली तेन्ना तांणी म्हणलें, सद्या थंडी, खांक वाडिल्ल्यान दुयेंतींची संख्याय वाडल्या. ती ल्हवू ल्हवू उणी जातली. मलेरिया दुयेंतींची संख्या उणी आसा. पूण डेंग्यूची लक्षणां आशिल्ले दुयेंती वाडत आसात. दीसभरांत अशे 10 दुयेंती येतात. पूण कांय दिसांनी ती संख्या उणी जावपाची शक्यताय आसा. ह्या हॉस्पिटलांत येतात त्या दुयेंतीक लागून एक दोतोर, दोन नर्स, तीन चार पॅरा मॅडिकल कर्मचारी हांकांय लागण जाल्या.
दुसरे वटेन वास्को भलायकी केंद्रा वतीन डेंग्यूचेर नियंत्रण दवरपा खातीर जाग्याजाग्यांनी धुंवर सोडटात. वखदांची फवारणी करतात. रहिवाशां मदीं जागृताय जावची हे खातीर ल्हान ल्हान बसका घेतात. ह्या प्रकरणांत लोकांनी खबरदारी घेवपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
