भांगरभूंय | प्रतिनिधी
म्हापशें, प्रतिनिधी: पर्वरीच्या आदल्या संजय स्कुलाच्या इमारतीच्या दुसऱ्या मजल्या वयले बाल्कनींतल्यान पडिल्ल्या सिडनी डिसोझा (४०, पर्वरी) ह्या दिव्यांग तरणाट्याक मरण आयलें. बाल्कनींतल्या लोखणाच्या कळमेल्ल्या ग्रिल्साक तेंकून राविल्लो सिडनी ३० आॅगस्टाक पडून गंभीर जखमी जाल्लो.
सिडनी हो आपले आवय वांगडा आधार केंद्राचेर गेल्लो. संजय स्कुलाच्या आदले इमारतीचे दुसरे माळयेर तें आसा. तळमाळयेर संजय स्कूल आसा. हे शाळेंत ४० पिराये वयल्या विशेश भुरग्यांक विवीध वस्तू, जेवण रांदप अश्या गजालींचें प्रशिक्षण दितात. हेच शाळेंत सिडनी प्रशिक्षण घेतालो. तो आधार कार्डाचेर कांय दुरुस्ती करपा खातीर आवय वांगडा थंय गेल्लो. केंद्रा भायर आशिल्ले बाल्कनींतल्या लोखणाच्या ग्रिल्साक धरून तो राविल्लो. पूण ते ग्रिल कळमेल्ल्यान ताच्या वजनान तुटलें आनी सिडनी ग्रिल्सा सयत सकयल पडलो.
हे घडणुकेंत कमरेक आनी तकलेक मार लागून सिडनी जखमी जाल्लो. ताचेर गोमेकोंत उपचार चलताले. पूण, उपचारा मजगतीं सोमार ११ तारखेक सांजेवेळार ताका मरण आयलें. पर्वरी पुलीस फुडलो तपास करतात. मजगतीं, सिडनीच्या कुटुंबाक ५० लाखांची मजत करची, अशी मागणी समाजवावुरपी प्रतिमा कुतिन्हो हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
