भांगरभूंय | प्रतिनिधी
इतिहास याद करपी बोट बांदपाचें काम सुरू
पणजी, प्रतिनिधी : दोन हजार वर्सां पोरण्या स्टीच्ड (शिवपाचे) तंत्रज्ञानान तयार जावपी बोट बाली बेटाची भोवणी करतली. बोट तयार जावपाक 21 म्हयने लागतले. 2025 वर्सा बालीची भोवणी करपा सयत ही बोट वापरात आसतली, अशें केंद्रीय संस्कृती मंत्री मिनाक्षी लेखी हांणी सांगलें.
खिळ्यांचो वापर करीनासतना शिवणीन बोटी बांदपी तंत्रज्ञान देशा सयत गोंयांत सुद्दा आशिल्ले. तेच पद्दतीन नौदला वतीन ऐतिहासिक शिवणीच्या तंत्रज्ञानाचेर (स्टीच्ड शीप) आधारीत बोट गोंयांत तयार जातली. लेखी हांचे हस्तुकी आयज कामाक सुरवात जाली. दिवाडे ही कार्यावळ जाली.
चंद्रार यान पावोवपाच्या वेळार आता भारत पोरण्या तंत्रज्ञानाच्या सहकार्यान दर्यांत बोटी सोडपाक लागला. दोन हजार वर्सां पयलीं बोट तयार करपाचे प्रगत तंत्रज्ञान भारतांत आशिल्लें. भारतांतल्यो बोटी इंडोनेशिया, जकार्ता, बाली, व्हिएतनाम हांगां वताल्यो. भारतांतले वेपारी मध्य पूर्व आशिया खंडात वेपार करताले. देशाच्या अमृत कालात हो इतिहास जागो करपाची गरज आसा. हे खातीर 9 कोटी खर्च करून स्टीच्ड तंत्रज्ञानाचेर आदारीत बोटीची उबारणी जाता. देशाचें दायज, संस्कृती जपपा सयत पोरणो भांगरा काळ निर्माण करपाची गरज आसा, अशें लेखी हांणी सांगलें.
नौदळ, केंद्रीय पर्यटन मंत्रालय आनी मेसर्स होदी इनोवेशन्स हांचो हो एकठांय उपक्रम आसा. नौदलान बोटीचो आराखडो तयार केला. केंद्रीय संस्कृती मंत्रालयान फावो तो निधी दिला. केंद्रीय जहाज मंत्रालय आनी विदेश वेवहार मंत्रालयान बोटीचे येरादारीची वेवस्था केल्या. बोट शिवपाच्या तंत्रज्ञानात बाबु संकरन हे तज्ज्ञ आसा. तांच्या फुडारपणा खाला बोट शिंवतले. बालीची भोवणी केले उपरांत सुद्दा ही बोट वापरात उरतली, अशें लेखी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
