भांगरभूंय | प्रतिनिधी
वांगड्यांक 11 टक्के लाभांश : संस्थेचे वर्सुकी बसकेंत साबार विशयांचेर चर्चा
वाळपय, प्रतिनिधी: सत्तरी अर्बन कॉपरेटीव्ह सोसायटीन फाटल्या 27 वर्सां सावन गिरायकांचें बरें जावचें होच विचार केला. ही संस्था गिरायकांच्या मनांत विस्वास निर्माण करपाक येसस्वी थारल्या. गिरायक, कर्मचारी, वांगडी हांणी हे संस्थेचेर विस्वास दवरला. ताका लागून हे संस्थेन आतां मेरेन राज्यांत तिसरो क्रमांक मेळयला. ताका लागून येवपी काळांत संस्थेक मेळिल्ल्या मल्टीपर्पज दर्ज्या वरवीं विवीध तरेचे प्रकल्प राबोवन रोजगाराच्यो संदी निर्माण करतले. अंदूं संस्थेक 2 कोटी 51 लाख रुपयांचो लाव जाला. ताका लागून गिरायकांक 11 टक्के लाभांश दितले, अशी घोशणा सत्तरी अर्बन कॉपरेटीव्ह सोसायटी तशेंच सत्तरी मल्टीपर्पज सोसायटी हांचे बसकेक संस्थेचे चेअरमन वासुदेव परब हांणी केली.
वाळपय लक्ष्मीबाई मेमोरियल सभाघरांत जाल्ले हे वर्सुकी बसकेक सगले वांगडी हाजीर आशिल्ले. ह्या वेळार विंगड विंगड विशयांचेर चर्चा जाली. माचयेर संस्थेचे उपाध्यक्ष कृष्णा गांवस, संचालक अॅड. यशवंत गांवस, अॅड. काशिनाथ माळशेकार, प्रेमनाथ हजारे, गोविंद कोरगांवकार, श्रीपाद सावंत, म्हाळू गांवस, नितीन शिवडेंकार, सपना परब, अंकिता गांवस हाजीर आशिल्लीं.
संस्थेची अर्थीक परिस्थिती बरी आसा. ताका लागून येवपी काळांत राज्यांत रोजगाराच्यो संदी तयार जावच्यो आनी अर्थीक क्रांती जावची हाचेर विशेश लक्ष दितले, अशें परब हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
