भांगरभूंय | प्रतिनिधी
पणजी, प्रतिनिधी : प्रादेशीक भाशां खातीर सल्लागार दुभाश्यांचें पॅनल तयार करपाचो लोकसभा सचिवालयाचो उद्देश आसा. हे संबंदी लोकसभा सचिवालयांत कंत्राटी पद्दतीचेर प्रादेशीक भाशां खातीर सल्लागार दुभाश्यांचें पॅनल तयार करपा खातीर सगळे पात्र अशासकीय भारतीय नागरीक आनी लोकसभा आनी राज्यसभा सचिवालयां, केंद्र/ राज्य सरकार, राज्य विधीमंडळ सचिवालयां, स्वायत्त संस्था, केंद्र/ राज्य भौशीक क्षेत्रांतली आस्थापनां, सर्वोच्च न्यायालय/ उच्च न्यायालयां आनी थळाव्या संस्थांच्या निवृत्त कर्मचार्यां कडल्यान अर्ज मागयल्यात.
सत्र काळांत सल्लागार दुभाश्यांच्या पॅनलाक पुराय वेळ तत्वांचेर आनी आंतर- सत्राच्या काळांत अर्दवेळ तत्वांचेर आवश्यकताये प्रमाण सेवा दिवची पडटली. पुराय वेळ सल्लागार दुभाश्यांक नेमणुकेच्या काळांत हेर खंयचेंय काम घेवपाची परवानगी दिवचे नात, पूण अर्दवेळ नेमणूक सल्लागार दुभाश्यांक सचिवालयाक पूर्व सुचोवणी दिवन हेर कामां घेवपाक मेळटलीं. अधिवेशनाचो काळ सत्र आपयिल्ले तारखे सावन ते सत्र सोप मेरेनच्या तारखे मेरेन आसतलो.
पात्र आनी इत्सुक उमेदवारांनी सरळ भरती फांटो, लोकसभा सचिवालय हांचे कडेन अर्ज करूंक शकता. चड तपशिला खातीर जशी, पात्रतायेची अट, निवड प्रक्रिया, भत्तो आनी हेर खातीर जायरात क्र. 1/ 2023 पळोवची, जी www.loksabha.nic.in ह्या संकेतथळाचेर उपलब्ध आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
