भांगरभूंय | प्रतिनिधी
कायद्या प्रमाण खर कारवाय जातली : मुख्यमंत्री
पणजी, प्रतिनिधी : गोंयांत वा देशांत सगळ्या धर्माचे लोक रावतात. दर एकेकल्याक आपआपल्या देवांची पुजा करपाचो अधिकार आसा. कोणेंच हेर धर्मा विशीं वायट उतरां काडचीं न्हय. धर्मीक भावना दुखोवपा सारकीं वक्तव्यां सरकार ह्यान फुडें सोंसून घेवचें ना. हिंदु आसूं वा क्रिस्तांव, दुसर्यांच्यो धर्मीक भावना दुखावोवप्यांचेर खर कारवाय सरकार करतलो, अशी शिटकावणी मुख्यमंत्री डॉ. प्रमोद सावंत हांणी दिल्या.
आपल्या देवा विशीं वा धर्मा विशीं दर एकल्याक आदर आसता. हाचो अर्थ दुसर्यांच्या धर्मा विशीं अनादर आसपाक फावो ना, अशें मुख्यमंत्र्यांनी म्हणलां. डाॅ. सावंत हांच्या मतांक भौशीक बांधकाम मंत्री निलेश काब्राल हांणी सुद्दा तेंको उक्तायला.
हेर धर्मा विशीं कोणूय कितेंय उलयतात. हो प्रकार हालीं खुबूच वाडपाक लागला. हाचे फुडें सरकार असले प्रकार सोंसून घेवचो ना. अशा प्रकारांक लागून समाजातली शांतिकाय इबाडपाचो धोको आसता, अशें काब्राल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
