भांगरभूंय | प्रतिनिधी
फुडले चार दीस यलो अलर्ट, मुरगांव, सांग्यार 24 वरांत 2 इंच पावस
भांगरभूंय । प्रतिनिधी
पणजीः महाराष्ट्र- कर्नाटक- उत्तर केरळाचे दर्यादेगेर उण्या दाबाचो पट्टो तयार जाल्ल्यान पुडले चार दीस नेटाचो पावस पडटलो, असो अदमास हवामान खात्यान उक्तायला.
हवामान खात्याच्या अदमासा प्रमाण शुक्रारा सगळ्या वाठारांनी पावस पडलो. सत्तरी, दिवचल वाठारांत हेर वाठारां परस पावसाचे प्रमाण चड आशिल्लें.
दिसाक सरासरी 23 मिमि. पावस पडलो. आतां मेरेन सरासरी 204.2 मिमि. पावस पडला. पावसाची तूट उणी जावन ती 69 टक्क्यांचेर पावल्या. अंदूं 8 जूनाक मॉन्सून केरळांत पावलो. ते उपरांत तीन दिसांनी म्हणल्यार 11 जूनाक तो गोंयांत पावलो. एल निनो आनी बिपरजॉय चक्रीवादळाक लागून मॉन्सून आयलो तरी पावस आयलोच ना. मॉन्सूना उपरांत सुमार बारा दीस सुके गेले. हाका लागून कालोर वाडलो. धरणांतल्या उदकाचो सांठो उणो जाल्ल्यान भिरांत निर्माण जाली. बिपरजॉयचो प्रभाव पयस जावपा सयत आतां महाराष्ट्र ते उत्तर केरळ मेरेन उण्या दाबाचो पट्टो तयार जाला. हाचो परिणाम म्हूण शुक्रारा सगळ्या वाठारांनी पावस पडलो. बिरेस्तारा परस शुक्रारा पावसाचें प्रमाण चड आशिल्लें. आतां 27 जून मेरेन पावसाचो नेट आसतलो, असो हवामान खात्याचो अदमास आसा. शुक्रारा पावसाक लागून शेतकारा सयत सामान्य मनशाक थाकाय मेळ्ळी. कांय वाठारांनी अडेज इंच इतलो पावस पडपाचो अदमास आसा. गोंय तशेंच दक्षीण महाराष्ट्र दर्यादेगेर वराक 55 किलोमिटर मेरेन वारे मारपाची शक्यताय आसा. पावसाक लागून चडांत चड तापमान देंवून 32 अंश जाल्लें.
फाटल्या 24 वरांतलो पावस (मिमिंत)
म्हापशें 11.2
फोंडें 32.0
पणजी 19.8
पोरणें गोंय 6.6
सांखळी 8.6
काणकोण 45.0
दाबोळी 38.8
मडगांव 32.0
मुरगांव 52.6
केपें 12.0 सांगें 63.3
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
