भांगरभूंय | प्रतिनिधी
गुजरातांत 36 वी राष्ट्रीय खेळ सर्त हालींच जाली. हातूंत आमकां पदकां मेळ्ळीं. 33 व्या सर्तींत आसामाक 148 पदकां मेळिल्लीं. मागीर तें राज्य फाटीं पडलें. मणिपूर हें तांचेच शेजारी, मात कायम पयल्या 10 त आसतात. एकादी घटना जेन्ना घडटा. वायट आसू काय बरी तिचेर भासास जावपाक जाय. तिचोरोडमॅप आपले कडेन आसपाक जाय. जी गजाल घडली, तिचें कारण आसताच पूण, आमी ते नदरे आड करतात. करियरा भितर तर असो रोडमॅप आसुंकूच जाय. म्हळ्यार ताचो अभ्यास आमी करूंक जाय. जाका आमी येवजण म्हणू येता.
तुमी ज्या फाट्यांत (स्ट्रीम) वचूंक सोदतात ताचो मात तरी अभ्यास आसूकूच जाय. आदल्या वेळार तुमका म्हणपाक संद आसली, म्हजो वळखीचो कोण ना? मागीर हांव चवकशी कशी करूं? परत म्हज्या गांवांतल्यान तें पयस आसा. पूण, आता तुमच्या बोल्सांत मोबायल फोन आशिल्ल्यान जाय ती म्हायती थोड्याच वेळान तुमी घेवं शकतात. हालींच कला अकादमीन तबलें, पेटी, भारतीय शास्त्रीय गायन, भरत नाट्यम, बांसरी हें शिकपाक उमेदवारा कडल्यान फुडल्या वर्सा खातीरचे अर्ज मागयल्यात. 10 ते 35 पिरायेच्या उमेदवारांनी पणजे प्रवेश घेवपाक अडचणी आसत तर विंगड विंगड सुवातां वेल्या केंद्रांनी प्रवेश घेवन शिकपाक सुरु करू येता.
ज्या अभ्यासक्रमा खातीर तुमी प्रवेश घेवपाक सोदतात ताचो अभ्यास करून घेवचो, अशे नमळायेन सांगीनशें दिसता. आता ही म्हायती घेवपाक तुमचे हात कोणें बांदुक नात…. आनी हातूंतलें साहित्य वाचूंक सहज मेळटा. प्रवेश घेतले उपरांतूय तुमी हो अभ्यास सुरु करू शकतात वा आदीं लेगीत. हो अभ्यास तुमका आयुश्यभर उपेगाक येतलो. तबलें आसूं वा पेटी शिकचे पयलीं बऱ्योच गजाली शिकूं शकतात. जेन्ना तुमी प्रवेश अर्ज करता तेन्ना सावन लेगीत ही म्हायती घेत जाल्यार तुमकां चड बरें पट्टलें. शास्त्रीय गायनान नाव जोडिल्ले पं. जितेंद्र अभिषेकी, मोगुबाई कुर्डीकार, अंजनीबाय मालपेकार, किशोरीताई आमोणकार, पं. रामदास कामत. आतांचे पं. प्रभाकर कारेकार सारकीं नांवां तुमकां खबर आसपाक जाय. तांणी संगीत शिक्षण घेवपाक जे त्रास काडले ताचो मागीर तुमका अदमास येवं शकता. एकेक नाव म्हळ्यार एकेक विद्यापीठ. आदी शिकपा खातीर घरदार, राज्य सोडून वच्चे पडटालें. आतां संगीत शिकपाची तजवीज खूब लागीं पावल्या. प्रत्येक लागींचे सुवातेर कोण ना कोण तरी शिकपाचो वर्ग घेता. हांचो लाव विद्यार्थ्यांनी घेवपाक जाय.
पेडणे, सांगे, काणकोण, साखळी, वाळपय सारक्या सुवातींतल्या इच्छुकांक त्या-त्या केंद्रांनी वचून शिकपाची सोय कला अकादमीन केल्या. केपें कला अकादमी, संगीत महाविद्यालयाचे तबलो शिक्षक अमित भोसले, संगीत महाविद्यालयाचे रुपेश गांवस, निवृत्त संगीत शिक्षक महेश साखळकार, श्रुती बोरकार, आग्रा घराण्याचे गायक कमलाकर नायक, पं. गिरीश संझगिरी सारक्यांची भेट घेवन संबंदीत फाट्यां विशी तुमी भासाभास करू शकतात. तांचे कडेन खूब कितें सांगपा सारकें आसतलें. पेटी सारको विषय घेयात. तुमका ती प्रत्येक कार्यावळींत नक्कीच दिसता. हें वाद्य खरें तर पाश्चात्य. युरोपांतल्यान इंग्रजा वांगडा तें भारतान पावलें आनी वाजोवपाक सहज आनी स्वरभरणा आशिल्ल्या कारणान लोकप्रीय जालें. हें वाद्य शिकोवपाची वेवस्था लागीं लागीं सगळे कडेन आसा. हाका बाजाची पेटी अशेंय म्हणटात. हाचेर तुमचीं बोटां सहजपणान फिरपाक जाय. हातून पायपेटीचो प्रकारुय आसता.
खेड्यांनी भजन. किर्तनांनी हें वाद्य सहज नजरेक पडटा. ब्रिटिश काळांत हें वाद्य भारतीय संगीताक उपकारचेंना म्हूण आकाशवाणीचेर ताचेर बंदी हाडिल्ली. मागीर देश स्वतंत्र जाले उपरांतूय ती उरली. 1980 साला उपरांत ती काडली. तबलें, पेटी आनी गायन हांचो योग्य मेळ जावपाक जाय. मागीर तुमका संगीताचो खरो आनंद मेळूं शकता. हाचे खातीर कला अकादमीन विद्यार्थ्याक हें वाद्य वा गायन शिकपाची संद हाडल्या. जाचे खातीर प्रवेश अर्ज तुमीं घेवं शकता. पेडणे- राजू बर्वे (9420725283), वाळपय- रामचंद्र नायक (9923615910), साखळी- प्रचला आमोणकार (8830766470), काणकोण- नितू महाले (7218619697), सांगें- समृद्धी थळी (9130547829) ह्या केंद्र प्रमुखां कडेन संपर्क सादचो. 9 नोव्हेंबर मेरेन फुडल्या वर्सा खातीर प्रवेशाचे हे अर्ज आसात, हे मतीन धरचें आनी अभ्यास करपाक सुरु करचो. नैमत्तिक शिक्षणा वांगडा संगीत शिक्षणाचो लाव जरूर घेवचो.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
