भांगरभूंय | प्रतिनिधी
पणजी : भाजपा फुडारी तशेंच टिकटॉक स्टार सोनाली फोगट खुनाचो तपास पुलीस उपअधिक्षकांच्या मार्गदर्शनाखाला सुरू आसा. तपासा खातीर मंगळारा पुलिसांचो एक पंगड हरियाणांत गेल्ल्याचे मुख्यमंत्री डॉ. प्रमोद सावंत हांणी पत्रकार परिशदेंत सांगलें.
तपास योग्य दिशेन सुरू आसा. तपासाचेर म्हजें लक्ष आसा. सोनाली फोगट खून प्रकरणाचो तपास सीबीआय कडेन दिवपाची सरकाराची तयारी आशिल्याचे आयतारा मुख्यमंत्र्यान स्पश्ट केल्ले. हे विशीं हरियाणाचे मुख्यमंत्री मनोहरलाल खट्टर हांचे कडेन आपणें चर्चा केल्या. तपास सीबीआय वरवीं जावचो, अशी सोनाली फोगट कुटुंबियांची मागणी आसा. पूण हे विशीं अजून निर्णय जावंक ना, अशें तांणी सांगलें.
सोनाली फोगट हिका 23 ऑगस्टाक दुबावीत रितीन मरण आयिल्लें. मरण आयलें उपरांत तिका हॉस्पिटलांत दाखल केल्ली. ह्या प्रकरणांत गोंय पुलिसांनी पयलीं सैमीक रितीन फोगट हिका मरण आयिल्ल्याचे नोंद केल्ले. पूण फोगट हिचो भाव रिंकू ढाका हांणी गोंयांत आयले उपरांत आपले भयणीचो खून जाल्ल्याचो दुबाव उक्तावन चवकशी करपाची मागणी पुलिशेंत केल्ली. गोमॅकाँत फोगट हिच्या कुडीचो पोस्टमार्टेम जाले उपरांत तिच्या कुडीचेर घाये दिसून आयले. तशेंच तिणें उदकांतल्यान ड्रग्स घेतिल्ल्यान मरण अायिल्ल्याचे स्पश्ट जाल्ले. ते उपरांत पुलिसांनी खुनाचो गुन्यांव नोंद करून तपास सुरू केलो. आतां मेरेन पुलिसांनी 5 जाणांक अटक केल्या.
खून प्रकरणांतले मुखेल दुबावीत सुधीर सांगवान आनी सुखविंदर पाल सिंग हांकां पयलींच 10 दिसांचो रिमांड दिला. हाका लागून पांचूय दुबावीत पुलीस कोठयेंत आसात.
सुधीर सांगवान आनी सुखविंदरपाल सिंग हांची चवकशी सुरू आसा. ह्या खून प्रकरणांत आनीक दुबावीत घुस्पिल्ल्याचो दुबाव आशिल्ल्यान पुलिसांनी अदीक तपास सुरू केला. ते खातीर पुलिसांचो एक पंगड हरियाणांत गेला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
