भांगरभूंय | प्रतिनिधी
म्हजें गोड गोमटें सुंदर गोंय. ह्या गोंया विशीं म्हाका कितलें सामान्य ज्ञान खबर आसा? आसूंक जाय.
शालेय अभ्यासक्रमांत गोंय, गोंयकार, गोंय मुक्तीचो इतिहास अशी जुजबी माहिती अभ्यासक्रमांत आसा. पूण, सविस्तर माहिती जाणा जावपाक तरणाट्यांनी यत्न करूंक जाय. कित्याक? पयली गजाल तो गोंयकार म्हूण ताका आपली भूंय, इतिहास, भुगोल, म्हान गोंयकार हांची माहिती जाय.
हालींच पणजेंत भाऊसायब बांदोडकार हांचे पुण्यतिथी निमतान ह्या म्हान फुडाऱ्याची जीण आनी कार्य ह्या विशयाचेर सुभाष जाणान सुंदर क्वीज घेतलें. आंतर महाविद्यालयीन. हे उपक्रम एकदम बरे.
गोंयांत सरकारी नोकरे खातीर यत्न करतना गोंय ह्या विशयाचेर एक सामान्य गिन्यान पेपर आसता. दरेका प्रस्नाक चार पर्याय दिल्ले आसात. तातूंतलो जापेचो अचूक पर्याय उमेदवारान निवडपाचो आसता. पोलीस उपनिरिक्षक पद आसूं वा हेर सनदी अधिकारी पदा खातीरची चांचणी आसूं वा कारकून पदा खातीर, हो पेपर आसताच. म्हणटकच, दर एकल्या उमेदवारान असल्या पेपरांक फुडो करपाक तयार आसप गरजेचें.
असलो चांचणी पेपर सोडयतलो जाल्यार ताचो अभ्यास आठ दिसांनी जायना. ती सतत उरपी अभ्यास प्रक्रिया. कान, दोळे आनी तकलेचे एन्टेने कायम सजग, सचेत दवरूंक जाय. राजकारण, अर्थकारण, उद्देग विश्व, खेळ मळा वयल्यो घडणुको खबर आसूंक जायच. चालंत खबरां विशीं, बदलां विशीं भान आसूंक जाय. हें सगळें मेळयतलो जाल्यार वाचनाक पर्याय ना. ते खातीर खास पुस्तकां आसात. संदर्भ ग्रंथ आसात. नेमान पेपर वाचप गरजेचें.
हें सगळें करून जण एकल्या इत्सूक विद्यार्थ्यान आपली अशी डायरी सांबाळची. जातूंत बारीक सारीक तपशील नोंद करून दवरचो. कारण परिक्षेंत प्रस्न सोंपे आसनात. ते मुद्दम घुस्पागोंदळाचे करून दितात. तपासपाक, उमेदवाराक खऱ्यांनीच कितलें आनी खोलायेन खबर आसा तें. घडणूक प्रसंग खंयच्या वर्सा घडली असो प्रस्न आयलो जाल्यार तो आपल्या नोट बूकांत आनी तकलेंत पयलींच नोंद करून दवरूंक जाय.
एम ए कोंकणीच्या फॅकल्टी बदल चांचणी पेपरांत कोंकणीचो इतिहास, कोंकणी कथा, कविता संदर्भांत चड प्रस्न आसतात. देखीक – गॅर्र हें शीला कोळंबकार हांचें पुस्तक खंयच्या वर्सा उजवाडाक आयलां? असो प्रस्न येवं येता. (जाप 2007). ते खातीर हो सगळो तपशील बारीकसाणेन तकलेंत दवरूंक जाय. म्हणजेच हीं पुस्तकां वाचीत रावंक जाय. वाचतना तातूंतल्यो नोंदी आपले तकलेंत वा पटयेंत नोंद करपाक जाय. घट्ट.
कोंकणीचे आद्य व्याकरणकार कोण असो प्रस्न आयलो जाल्यार ताची जाप थॉमस स्टिफन्स. खूब खेपे कवितेच्यो वळी दितात आनी कवी वळखूंक सांगतात. देखीक – सुख ना रे पयस पळे उदक कशें तें व्हांवता? ताची जाप – बाकीबाब बोरकार. खूब खेपे चार पर्याय दिल्ले आसतात. पर्याय आसतकच सोंपेंय जाता आनी कठिणूय आसता. खबर आसुनूय घुस्पुपाक जावं येता.
गोवा युवा महोत्सवांत सुरवातीच्या कांय वर्सांनी हांवें क्वीज मास्टर म्हूण प्रस्नमंच सर्ती घेतल्यात. चडशा जाणांक ताचो विसर पडला. गोंय विशयाचेर केंद्रीत ही सर्त. अजुनूय ती चलता. खूब जाणांनी म्हजे सर्तींतले आनी हेर कांय प्रस्न वेंचून पुस्तक उजवाडावचें अशी कल्पना मुखार हाडिल्ली. पूण म्हज्या व्यापांक लागून तो विशय सद्या तरी फळाक येवंक ना. मनांत आसा.
यूपीएससीच्या आयएएस, आयपीएस आनी आयएफएस आनी हेर सेवा परिक्षां खातीर खंयचोय विद्यार्थी कोंकणी पेपर निवडूंक शकता. प्रिलिमेक आनी मेन परिक्षेक. कांय वर्सां आदीं कर्नाटकांलें बाय छाया (नांव सारकें याद जायना, मंगळूर वा कारवारचें आसत) हाणें आयएएस परिक्षेक कोंकणी पेपर घेतलो. प्रिलिमेक घेतिल्लो. पास जालें. मेन परिक्षेक म्हळ्यार लेखी परिक्षेक ताणें कोंकणी पेपर बरयले. ते खातीर अभ्यास करूंक तें गोवा विद्यापिठांत येवन राविल्लें अशें कळ्ळें. कालांतरान तें आयएएस पास जालें. त्या वेळार हांव ताचे कडेन फोनार परबीं दिवपा खातीर उलयलों ही याद जाता.
आयज जर कोणेंय कोंकणी उलोवपी विद्यार्थ्यान यूपीएससी परिक्षेक कोंकणी पेपर घेतलो जाल्यार प्रिलीम परिक्षेक चार पर्यायांच्यो जापो आशिल्ल्या पेपराक फुडो करूंक ताका रेडिमेड प्रॅक्टीस पुस्तक जाय. प्रस्नावळीचें पुस्तक जाय. तेंय आमकां तयार करचें पडटलें. कोंकणी संस्थांनी हें काम मनार घेवंक जाय.
स्पर्धात्मक परिक्षा दिवपाची संस्कृती गोंयांत वाडपाक जाय. युवा पिळगे मदीं हे विशीं अदीक जागृताय जावंक जाय. आयएएस परिक्षा आपले भाशेंतल्यान दिवं येता, हें सादें तथ्य भुरग्यांक कळोवंक जाय. प्रस्नमंच सर्ती हें हे दिशेन एक टॉनीक. हे खातीर एकॅडॅमीक वातावरण खेळटें घोळटें दवरूंक डिजिटल माध्यमांचो आनी सोशल मिडियाचो आदार कल्पकतेन घेवंक जाय. हे यत्न सातत्य दवरून जावंक जाय. कश्टसाध्य आसूं, शक्य आसा. आमचीं भुरगीं बाबत कुळां न्हयच न्हय…
मुकेश थळी
फोंडे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
