भांगरभूंय | प्रतिनिधी
पणजी पुलिसांची कारवाय; मुंबय आनी महाराष्ट्रांत 33 गुन्यांवांनी वांटो
पणजी: मुंबय आनी महाराष्ट्रांतल्या विवीध पुलीस स्टेशनांनी 33 परस चड गुन्यांवांनी जाय आशिल्लो, नावाडगो गुन्यांवकार विक्रांत उर्फ विकी दत्तात्रय देशमूख हाका पणजी पुलिसांनी शेनवारा अटक केली. अटक केल्ल्या दुबाविताक पणजेंतल्या पयलो वर्ग न्यायालयान चार दीस पुलीस कोठी दिल्या.
उत्तर गोंय पुलीस अधिक्षक शोबीत सक्सेना हांणी दिल्ले म्हायती प्रमाण, ह्या प्रकरणांत नवी मुंबय पुलीस विभागाच्या नेरूल पुलीस स्टेशनार 2019 वर्सा खून प्रकरणांत भादंसंच्या शस्त्र कायदो आनी मोक्का कायद्या खाला विक्रांत उर्फ विकी विरोधांत गुन्यांव दाखल जाला. ह्या प्रकरणांत तो फरार आशिल्ल्यान मुंबय पुलीस ताचो सोद घेताले.
मजगतीं, नावाडगो गुन्यांवकार विकी कळंगूटे एका हॉटेलांत देंविल्ल्याची म्हायती पुलिसांक मेळिल्ली. ते प्रमाण ही म्हायती मुंबय पुलिसांनी उत्तर गोंयच्या पुलिसांक दिली. ते प्रमाण, शेनवारा सांजवेळा ताचेर पाळो दवरिल्लो तेन्ना विकी पणजेंतल्या एका कॅसिनाेंत आशिल्ल्याची म्हायती मेळ्ळी. ते प्रमाण पुलीस अधिक्षक शोबीत सक्सेना आनी उपअधिक्षक सुदेश नायक हांच्या मार्गदर्शना खाला पणजीचे पुलीस निरिक्षक निखील पालयेंकार हांच्या फुडारपणा खाला पुलीस उपनिरिक्षक मयूर पणशीकार, पुलीस कॉन्स्टेबल नितीन गोवकार, आदित्य म्हाड्डोळकार, मनोज पेडणेंकार, परेश बुगडे, रामा घाडी आनी हेर पुलिसांनी शेनवारा मध्यान रातीं वाठारांत सांपळो लायलो.
तशेंच पोरण्या सचिवालया कुशीक ताची टोयोटा फॉच्युर्नर मोटार पार्क केल्ल्याची म्हायती मुखार आयली. ते प्रमाण कॉन्स्टेबल मनोज पेडणेंकार हाणे आपली खाजगी मोटार ताचे फाटल्यान लायिल्ली आनी आडमेळीं निर्माण केली.
मजगतीं, कांय वेळान एक मनीस थंय येवन मनोजाक मोटार काडपाची विनंती केली. ह्या वेळार दुबाव आयिल्ल्यान मोटार काडपा बदला मनोजान ताची अदीक चवकशी केली तेन्ना संबंदीत मनीस नावाडगो विक्रांत उर्फ विकी दत्तात्रय देशमूख आशिल्ल्याचें मुखार आयलें. ह्याच वेळार ताणें आपली गाडी थंयच सोडून पोरण्या सचिवालयाचे फाटले वटेन धांव मारली.
उपरांत पुलीस कॉन्स्टेबल मनोज पेडणेंकारान ताचो फाटलाग करून एका कॅसिनोचे भायर ताका धरले उपरांत हेर पुलिसांनी ताका ताब्यांत घेवन पुलीस स्टेशनार हाडलो. ह्या वेळार ताची तशेंच मोटारीची झडटी घेतली तेन्ना पुलिसांक ताचे मोटारींत एक पिस्तूल आनी पांच जित्यो गुळयो सांपडल्यो.
पणजी पुलीस निरिक्षक निखील पालरयेंकारान विकी आड शस्त्र कायद्याचें 1959 कलम 3 आर डब्ल्यू 25 खाला गुन्यांव दाखल करून अटक केली. अटक केल्लो नावाडगो गुन्यांवकार विक्रांत उर्फ विकी देशमूख हाका पुलीस कोठये खातीर आयतारा पणजेंतल्या पयलो वर्ग न्यायालयांत हजर करतकूच न्यायालयान दुबाविताक चार दीस पुलीस कोठी दिल्या.
पिस्तूल नाशिल्ल्यान पुलीस वाटावलो: मुंबय पुलीस
कॅसिनोंत पिस्तूल व्हरपाक परवानगी नाशिल्ल्यान नावाडगो गुन्यांवकार विक्रांत उर्फ विकी दत्तत्राय देशमूखान आपलें पिस्तूल मोटारींत दवरिल्लें. मजगतीं, कॅसिनोंतल्यान भायर येतकूच रोखडेंच मोटारी कडेन येवन बसता म्हणसर पुलीस कॉन्स्टेबल मनोज पेडणेंकारान ताची चवकशी केल्ल्यान ताणें धांव मारली. ह्या वेळार ताचे कडेन पिस्तूल नाशिल्ल्यान पुलीस वाटावलो नाजाल्यार ताणें त्या पुलिसाचो गेम करपाचो अशें मुंबय पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
