भांगरभूंय | प्रतिनिधी
उद्देग मंत्रीः विधानसभेंत उद्देग खात्यांच्या मागण्यांचेर चर्चा
भांगरभूंय I प्रतिनिधी
पणजी : उद्देगीक धोरणाच्या अंमलबजावणे उपरांत 5 वर्सांत गोंयांत 20 हजार कोटींची उद्देगीक गुंतवणूक जातली. हातूंतल्या उद्देगांनी 30 हजार नोकऱ्यो तयार जातल्यो. नव्या उद्देगीक धोरणाचो मसुदो आयज मंत्रीमंडळ बसकेंत येतलो, अशें उद्देग मंत्री मॉवीन गुदिन्हो हांणी सांगलें.
सभाघरांत मंगळारा पंचायत, येरादारी, उद्देग खात्यांच्या मागण्यांचेर चर्चा जाली. जाप दितना मंत्री मॉवीन गुदिन्हो हांणी ही म्हायती दिली. उद्देगीक वसणुकांनी 20 लाख चौखण मिटर जागो उपलब्ध आसा. ते भायर बरोच जागो आसा. उद्देजकांक विस्तारा खातीर तशेंच नव्या उद्देगां खातीर ही जमीन दितले.
विद्यालयां खातीर 200 बशींची गरज
बालरथ बशींचे सुवातेर कदंबाच्यो 86 बशी चलतात. विद्यालयां कडल्यान 200 बशींची मागणी आसा. कोरोना म्हामारीक लागून खाजगी बस वेवसायाचें व्हड लुकसाण जालें. गोंयांत 1,107 खाजगी बशी आशिल्यो. कोरोना उपरांत आतां 600 ते 700 खाजगी बशी चलतात. 407 बशींचो उणाव आसा.
खाजगी बसवाले बशी चलोवपाचे स्थितींत नात. हो उणाव कदंबाच्यो बशी भरून काडटात. कदंबाच्यो 496 बशी आसात. ते भायर 50 इलेक्ट्रीक बशी आसात. इलेक्ट्रीक बशी आसल्यो तरी चार्जींग स्टेशनांचो उणाव आसा. ल्हव ल्हव चार्जींग स्टेशनां उपलब्ध जातली. इलेक्ट्रीक बशी म्हारग आसात, पूण डिझेलाचो दर पळयल्यार त्यो घेवप परवडटा. खाजगी बशी खातीर सरकारान 54 कोटी रूपयांचें अनुदान दिलां. इंधना खातीर अनुदान दिवपी येवजण 2019 वर्सा बंद जाली. खाजगी टॅक्सीकारांचो कारभार पळयल्यार ‘ओला’, ‘उबर’ सारके अॅग्रेगेटर आयल्या बगर पर्याय ना. आतां मेरेन 88 टक्के टॅक्सीकारांनी डीजीटल मिटर बसयल्यात. मिटर बसोवन लेगीत टॅक्सीकार तांचो वापर करिनात. हो प्रकार योग्य नाशिल्ल्याचे मंत्री मॉवीन गुदिन्हो हांणी सांगलें.
वास्कोच्या बसस्थानकाचें काम प्राधान्यान पुराय करतलें. सध्या काम बंद दवरून कंत्राटदार फरारी आसा, अशें तांणी सांगलें.
कोयर वेवस्थापना खातीर पंचायतींक चड निधी
कोयर वेवस्थापना खातीर पंचायतींक आनीक निधी मेळटलो. ते भायर खासा कर्मचार्यांची नेमणूक कोयर वेवस्थापना खातीर जातली. जे पंचायत सचीव पंच, सरपंचांक सहकार्य करिनात, तांची बेगोबेग बदली करपाचे धोरण सरकारान सुरू केलां, अशें पंचायत मंत्री मॉवीन गुदिन्हो हांणी सांगलें. पंचायतींनी 25 हजार घरां नेमीत करून तांका नंबर दिला. हातूंतल्यान 1 कोटी 20 लाख रुपया जमा जाल्यात. जिल्हो पंचायतींक घरनिर्माण वसणुकेंतल्यो ओपन स्पेसीस विकसित करपाचे अधिकार दिवपाचो विचार आसा. आनीक अधिकार तांका दिवप शक्य जावचे ना, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
