भांगरभूंय | प्रतिनिधी
विद्यार्थी तशेंच विद्यार्थिनींक मेळटलो लाव; धावीचे परिक्षके 70 टक्के गूण गरजेचे
पणजी : अनुसुचीत जाती आनी अनुसुचीत जमातीच्या 240 गुणवान विद्यार्थ्यांक अंंदूं सावन फुकट लॅपटॉप मेळटलो. धावी पास जाल्ल्या विद्यार्थ्यांक हे येवजणेचो लाव मेळटलो. म्हायती तंंत्रज्ञान खात्या वतीन ही येवजण चालीक लागतली.
अनुसुचीत जाती आनी अनुसुचीत जमातीच्या विद्यार्थ्यां खातीर तरेकवार येवजण्यो आसात. वर्सुकी शुल्कांत सूट दिवपा सयत युनिफॉर्म तशेंच पुस्तकांं फुकट दिवपी येवजण्यो आसात. हे येवजणेंत आतां फुकट लॅपटॉप दिवपी येवजणेची भर पडटा. हे येवजणेची अधिसुचोवणी जारी जाल्या. अनुसुचीत जातीच्या (एससी) दरेका म्हालांतल्या 10 विद्यार्थ्यांक येवजणेचो लाव मेळटलो. दरेका म्हालातंले 5 विद्यार्थी आनी 5 विद्यार्थिनींची निवड जातली. हाका लागून अनुसुचीत जातीतल्या 120 विद्यार्थ्यांक फुकट लॅपटॉप मेळटले. अनुसुचीत जमातीच्या विद्यार्थ्यांक लेगीत असोच लाव मेळटलो.
दरेका म्हालांतल्यान 10 विद्यार्थ्यांंची निवड जातली. हातूंत 50 विद्यार्थी आनी 5 विद्यार्थिनीं आसतल्यो. अनुसुचीत जातीतल्या 120 जाल्यार अनुसुचीत जमातीतल्या 120 विद्यार्थ्यांक लाव मेळटलो. हाका लागून दर वर्सा 240 विद्यार्थ्यांक फुकट लॅपटॉप मेळटले. एससी तशेंच एसटी गटांत म्हालांत पयल्या 5 विद्यार्थ्यांक येवजणेचो लाव मेळटलो. तशेंच पयल्या 5 विद्यार्थिनींची येवजणे खातीर निवड जातली. धावीचे परिक्षके उण्यांत उणे 70 टक्के गूण मेळप आवश्यक आसा. 70 टक्के परस उणे गूण मेळिल्ले विद्यार्थी येवजणे खातीर पात्र थारचे नात. तशेंच धावेची परिक्षा पयल्या टप्प्यांत पास जावप गरजेचें आसा.
संंगणक कुशळटाय येवजणेक
3 वर्सांंची मुजतवाड
अनुसुचीत जाती तशेंच जमातीच्या लोकांंक आयटी तशेंच संंगणकाचें ज्ञान मेळचें, हे खातीर म्हायती तंंत्रज्ञान खात्यान खाशेली येवजण सुरू केल्ली. हे येवजणेक तीन वर्सांची मुजतवाड दिल्या. 2010 वर्सा ही येवजण सुरू जाल्ली. ही येवजण सुरवेक 3 वर्सांची आसली. तीन वर्सांनी हे येवजणेक मुजतवाड मेळत रावल्या. आतां ही येवजण 2025 मेरेन सुरू उरतली.
एससी तशेच एसटी जमातीच्या लोकांंक संंगणकाचें ज्ञान दिवपाचो हेत आशिल्लो. ते भायर तरणाट्यांक आयटीचें ज्ञान दिवपा सयत प्रशिक्षण वर्ग सुरू करप. तशेंच नोकरेच्यो संंदी पळोवन ते प्रमाण प्रशिक्षण वर्ग सुरू करपा खातीर ही येवजण आशिल्ली. संंगणक अभ्यासक्रमा खातीर इत्सुकांंनी अर्ज करपाची गरज आसा. दरेका कुटुंंबात एकल्याक आयटी तशेंच संंगणकाचें ज्ञान मेळचें, हो हाचे फाटलो हेत आसा. 4 ते 26 सप्तका मेरेनचे हे अभ्यासक्रम आसात. अभ्यासक्रमा मदीं पदविका अभ्यासक्रमाचोय आस्पाव आसा. सायबर सुरक्षा, प्रोग्रामींग, वॅब डिजायनींग, डिजिटल मार्केटींग, ऑटो कॅड ह्या अभ्यासक्रमांचो आस्पाव आसा. निरक्षरांं खातीर लेगीत काय अभ्यासक्रम आसात.
येवजणे खातीर वर्साक 1 कोटी 80 लाखांची तजवीज
हे येवजणेची कारवाय इन्फोटेक म्हामंडळा वतीन जातली. इन्फोटेक म्हामंंडळ मेसर्स आयटीजी हांंकां पयशे दितली. आयटीजी कंंपनी लॅपटॉप विकते घेवन विद्यार्थ्यांक दितले. अनुसुचीत जाती येवजणे खाला 90 लाख जाल्यार अनुसुचीत जमाती येवजणे खाला 90 लाख रुपया हे येवजणे खातीर दितले. येवजणेचो पयसो खर्च जालो ना, जाल्यार तो परतून सरकाराचे तिजोरेंत जमा जातलो. लॅपटॉप सोडून हेर कसल्याच कामा खातीर हो निधी वापरूंक मेळचो ना. जायरात तशेंच कार्यावळी खातीर हातूंतलोच निधी वापरचो पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
