भांगरभूंय | प्रतिनिधी
दिसाक 14 जाण सोरो पियेवन चलयतात वाहन
पणजी: गोंयांत अपघातांनी वाड जावन आयिल्लें मरण आनी येरादारीत शिस्त येवपा खातीर येरादारी पुलिसांनी वर्सभरांत वेगळ्योवेगळ्यो विशेश मोहिमो राबयल्यात. हाचोच एक भाग म्हूण येरादारी पुलिसांनी गोंयांत 2024 वर्सा सोरो पियेवन वाहन चलयिल्ले खातीर 5,438 वाहन चालकाचेर कारवाय केल्या. ही आंकडेवारी पळयत जाल्यार दिसाक सरासरी 14 जाण सोरो पियेवन वाहन चलयत आशिल्ल्याचें मुखार आयलां.
गोंयांत 1 जानेवारी ते 26 डिसेंबर 2024 मजगतीं 2,640 अपघातांची नोंद जाल्या. 256 भिरांकूळ अपघातांत 270 जाणांक मरण आयलां. जाल्यार ह्याच काळांत 2023 वर्सा 2,795 अपघात जाल्ले. तातूंतल्या 255 भिरांकूळ अपघातांत 275 जाणांक मरण आयिल्लें. हे आंकडेवारी वेल्यान दीसपट्टे 7 अपघात जाल्यार 32 वरांत एकल्याक अपघात जावन मरण येत आशिल्ल्याचें स्पश्ट जाता.
गोंयांत येरादारी नेमांचें उल्लंघन केल्ल्यान अपघात आनी अपघाती मरण जायत आसात. अशा नेमांचें उल्लंघन करप्यांचेर येरादारी पुलीस विभागांनी विशेश मोहीम सुरू करून कारवाय करपाचे निर्देश वेळावेळार दितात. हातूंत मुखेलपणान सोरो पियेल्ले चालक, गतीन वाहन चलोवप, वाहन चलयतना मोबायलाचो वापर करप, सीट बेल्ट न घालप, वाहनांक काळे हारशे लावप अशा प्रकारांचो आस्पाव आसा.
गोंयांत येरादारी पुलीस विभागान अशा सोरो पियेवपी चालकाचेर कारवाय केल्या. ते प्रमाण 2024 वर्सा 5,438 वाहन चालकांचेर कारवाय केल्या. जाल्यार फाटल्या वर्सा 2023 वर्सा 1,807 जाणांचेर कारवाय केल्ली.
2023 वर्साचे कारवायेची तुळा करीत जाल्यार अंदूं तातूंत तीन पटीन वाड जाल्या. सर्वोच्च न्यायालयान रस्तो सुरक्षा समिती स्थापन केल्या.
हे समितीन येरादारी नेम पाळूंक नाशिल्ल्यांचें परवाने तीन म्हयन्यां खातीर निलंबीत करपाची शिफारस केल्या. ते प्रमाण गोंय पुलिसांच्या येरादारी विभागान सोरो पियेल्ल्या वाहन चालकाचे परवाने जप्त करून ते तीन म्हयन्यां खातीर निलंबीत करपा खातीर संबंदीत येरादारी खात्यांत धाडून दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
