भांगरभूंय | प्रतिनिधी
पावणी प्रक्रिया सुरू; सुमार 400 कोटींचो महसूल मेळपाची शक्यताय
पणजी: गोंयांतल्या 18 खनीज डंपाची पावणी करपाचें राज्य सरकारान निश्चीत केलां आनी ते खातीर सुमार 174 जाण सर्तींत आसात. ह्या डंपाचेर सुमार 50 मिलियन टन खनीज म्हाल आसून तातूंतल्यान सरकाराचे तिजोरेंत सुमार 400 कोटी रुपया येवंक शकतात अशी म्हायती खण संचालक नारायण गाड हांणी बुधवारा ‘भांगरभूंय’ कडेन उलयतना दिली.
कांय खणपट्ट्यांचे पावणे उपरांत सरकारान आतां डंप पावणे कडेन लक्ष वळयलां. पयल्या टप्प्यांत 18 डंपाची पावणी करपाची प्रक्रिया खण खात्यान सुरू केल्या. ते खातीर आतां मेरेन 174 जाणांनी निविदा कागदपत्रां खरेदी केल्यात. निविदा प्रक्रिया फुडल्या कांय दिसांनी सुरू जातली अशें गाड हांणी सांगलें.
पयल्या टप्प्यांत ज्या 18 डंपाची पावणी करपाचे निश्चीत केलां तातूंत सुमार 50 मिलियन टन इतलो खनीज म्हाल आसा. तातूंतल्यान विवीध करांच्या माध्यमांतल्यान सरकाराक सुमार 400 कोटींचो महसूल मेळपाचो अदमास आशिल्ल्याचें तांणी नमूद केलें.
मजगतीं, फाटल्या 12 वर्सां सावन बंद आशिल्लो खण वेवसाय परतून सुरू करपा खातीर सरकारान हालचाली सुरू केल्यात. ताचोच भाग म्हूण फाटल्या कांय म्हयन्यांत विवीध कडेनच्या खणपट्ट्यांची पावणी केली. तातूंतल्यान सरकाराक अपेक्षीत महसूल लेगीत मेळ्ळा. उपरांत सरकारान आतां खूबशा वर्सां सावन विवीध वाठारांनी पडून आशिल्ल्या डंपाचे पावणेची प्रक्रिया सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
