भांगरभूंय | प्रतिनिधी
खबरां संस्था
बर्मिंगहॅमः राष्ट्रकूल सर्तींत भारताच्या मीराबाई चानू, संकेत सरगन, जेरेमी लालरिन्नुगा हांणी भांगरा पदकां जिखून भारताचे कामगिरी उंच व्हेल्या. पीव्ही सिंधू, बजरंग पुनिया, विनेश फोगट, साक्षी मलीक हांच्या सारक्यो अव्वल खेळगड्यांचेर आतां सगल्यांची नदर आसा. मात राष्ट्रकुल सर्तीच्या पयल्याच दिसा 14 वर्सां पिरायेची स्क्वॉश खेळगडी अनाहत सिंगान सगल्यांची नजर ओडून घेतल्या. हे सर्तींत वांटेकार जावपी तें भारताची सगल्यांत उणे पिरायेची खेळगडी आसा.
अनाहतान बायल एकेरीच्या 64 रावंडांत आपले पसर पिरायनेन व्हड आशिल्ल्या जेसा रॉसाक सेगीत तीन गेमांत हारयलें. ताका लागून सगल्यांची नदर ताचे कडेन पावल्या. 13 मार्च 2008 दिसा दिल्लींत जल्मल्ल्या अनाहताक स्क्वॉस खेळपाची प्रेरणा तिची व्हडली भयण अमिरा कडल्यान मेळ्ळी.
पिरायेच्या 6व्या वर्सा सावन ताणे बॅडमिंटन खेळपाक सुरवात केली उपरांत स्क्वॉशांत कारकिर्द करपाचो निर्णय घेतलो. सद्या तें 9वे यत्तेंत शिकता. सक्वॉशांत थोड्या कालावधींत ताणे 11 वर्सां सकल आनी 13 वर्सा सकयल्या खेळगडींत पयल्या नंबराचेर आनी 2019 वर्सा ब्रिटिश ओपनांत 11 वर्सां सकयल्ल्या गटांत भारता खातीर ताणे भांगरा पदक जिखलें. ताच्या वर्सा आशियाई ज्युनिअर सर्तींत ताका कांस्य पदक फावो जालें. स वर्सां परक कमी कालावधींत ताणे 46 सर्किट वस्तादपण, दोन राष्ट्रीय सर्किट जैतपदां, दोन राष्ट्रीय चॅम्पिशनशीप आनी 8 आंतरराष्ट्रीय जैतपदां मेळयल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
