भांगरभूंय | प्रतिनिधी
मुख्यमंत्र्यांनी घेतलो अर्थसंकल्पाचे कार्यवायेचो आढावो
पणजी : सरकाराच्या २४ खात्यांनी अर्थसंकल्पांत (२०२४ – २५) तरतूद आशिल्ल्या निधी मदलो ३० टक्केच निधी खर्च केला. येवपी तीन म्हयन्यांनी उरिल्लो निधी खर्च करपाचे निर्देश मुख्यमंत्री डॉ. प्रमोद सावंत हांणी दिल्यात. अंदूंचो (२०२५ – २६) अर्थसंकल्प मार्च म्हयन्यांत सादर जावपाचो आसा आनी ताची तयारी सुरू जाल्या.
डॉ. सावंत हांणी २०२४ – २५ वर्साच्या अर्थसंकल्पाच्या कार्यवाहीचो आढावो घेवपा वांगडा येवपी अर्थसंकल्पाचे तयारे विशीं बसका घेतली. सचीव तशेंच खात्यांचे मुखेली बसकेक हजर आशिल्ले. बसके उपरांत डॉ. सावंत हांणी पत्रकार परिशदेंत ही म्हायती दिली.
अर्थसंकल्पाच्या कार्यवाहीचो कृती अहवाल (ऍक्शन टेकन रिपोर्ट) सदां भशेन अंदूंय सादर करतले. सरकाराच्या २४ खात्यांनी मंजूर केल्ल्या १६८० कोटीं मदले फकत ३२३ कोटी रूपया खर्च केल्यात. १२८५ कोटी रूपयां वापरूंकच ना. खर्चाचें प्रमाण फकत ३० टक्के आसा. ह्या खात्यांक येवपी तीन म्हयन्यांत उरिल्लो निधी खर्च करपाचे आदेश दिल्यात. तशेंच अर्थसंकल्पांतल्या ४४६ मदल्या ७० आस्वासनांची कारवाही जाल्या. २६३ आस्वासनांची कार्यवाही सुरू जाल्या. १०७ आस्वासनांची मार्च २०२५ उपरांत पुराय जातली. ६ आस्वासनांची कार्यवाही जावंक ना.
जीएसडीपीचे तुळेंत रिणाचें प्रमाण २५ टक्क्यांचेर हाडपाची मोख आशिल्ली. ती साध्य जावंक ना. मात हें प्रमाण २९.२७ टक्क्यांचेर आयलां. आवटस्टँडींग गॅरेंटी (हमी थकबाकी) फाटल्या वर्सा १५०० कोटी आशिल्ली. ती अंदूं २९८ कोटीं वयर आयल्या. अर्थसंकल्पांतली १४२३ कोटींचो महसूल जमा करपाक सरकाराक येस आयलां. केंद्र सरकाराच्या निधीचोय ९० टक्क्यां मेरेन विनियोग जाला.
खात्यांनी महसूल वाडी खातीर येवजण्यो राबोवच्यो. अर्थसंकल्पांतले निधीचो वापर चडांतचड आनी योग्य तरेन जावपा कडेन मोख दिवची. खात्या सयत महामंडळां तशें स्वायत्त संस्थांनी साधनसुविधांचो चडांत चड वापर करचो. जनतेक कार्यक्षम आनी बेगीन सेवा मेळपा खातीर सोपस्कार घटमूट करचे. खात्यांनी कामां तशेंच येवजण्यांच्या कार्यवायेचो नेमान आढावो घेवचो, अश्यो सुचवण्यो मुख्यमंत्र्यांनी बसकेंत केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
