भांगरभूंय | प्रतिनिधी
झुंझुनू, खबरां संस्था: भारतीय अंतरिक्ष संशोधन संघटनेचे (इस्रोचे) मुखेी डॉ. एस. सोमनाथ हांणी २०४० मेरेन भारतीयाक चंद्राचेर देंवोवप हो आमचो हेत आसा, अशें सांगलें. ते खातीर आमी अंतरिक्ष केंद्र बांदचें पडटलें, कारण मनशाक चंद्राचेर धाडपाक माध्यम आसपाक जाय. ताका लागून सूक्ष्मगुरूत्वाकर्शण संशोधन आनी जायत्या खाशेल्या अंतरिक्ष मिशनांचे उद्दिश्ट साध्य करचें पडटलें. सध्या आमी शिकपाच्या टप्प्यांत आसात आनी आमचो शिकपाचो प्रवास चालू आसा अशें तांणी सांगलें.
झुंझुनूच्या बिर्ला इन्स्टिट्यूट ऑफ टेक्नॉलॉजी अँड सायन्स (बीआयटीएस) पिलानी इन्स्टिट्यूटांत आयतारा जाल्ल्या दीक्षांत सुवाळ्यांत तांणी ही म्हायती दिली.
अमेरिकन उद्देजक एलोन मस्क मंगळार लोकवस्ती स्थापन करपाची येवजण आंखतात. लाखांनी लोकां खातीर थंय वसणूक बांदपाची तांची येवजण आसा आनी तिकेट काडून लोक थंय पावूंक शकतात.
सोमनाथ हांणी सांगलें, म्हाका दिसता अंतराळ पर्यटनाचे क्षेत्र बरेंच मुखार सरतलें. ह्या मळारूय भारताची बरीच तांक आसा. आमचे चंद्र आनी मंगळ मिशन संवसारांतल्या सगळ्यांत उण्या खर्चाच्या मिशनां मदीं आसात आनी ह्या दोनूय मिशनांनी आमकां व्हड मान मेळ्ळा.
इस्रोच्या मुखेल्यान मुखार म्हणलें, आमी फुडल्या ५ ते ६० वर्सां खातीर कार्यावळींचीय रुपरेखा मांडल्या. ते खातीर सरकारान ३० हजार कोटी रुपयांचो अर्थसंकल्पय जाहीर केला. पुराय अंतरीक्ष वेवस्था बदलत आसा. अंतरीक्ष शास्त्रांत जावपी बदल समजून घेवपाक जाय. हांगा भितर सरप आनी ताचे नेम शिकप पयलीं इतलें कठीण न्हय. अमेरिकन लोकांनी चंद्राच्या मिशनाचेर विचार करपाक सुरवात केली तेन्ना तांकां अंतरीक्ष कार्यावळींत व्हड प्रमाणांत गुंतवणूक करची पडिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
