भांगरभूंय | प्रतिनिधी
पणजीः पर्यटन खातें अंदूं कार्नीवल १३ ते १७ फेब्रुवारी मजगतीं घडोवण हाडटलें. कार्नावालाचें अधिकृत उक्तावण पर्वरे जातलें. उपरांत हेर शारांनी परेड जातली. पर्यटन खात्यान कार्नावाला खातीर वट्ट १.५३ कोटी खर्च येतलो, अशी म्हायती गोंय पर्यटन उदरगत म्हामंडळाचे वेवस्थापक संचालक कुलदीप आरोलकार हांणी दिली.
पणजे पर्यटन भवनांत आपयल्ले पत्रकार परिशदेंत आरोलकार उलयताले. ह्या वेळार पर्यटन उपसंचालक धीरज वाघळे, म्हामंडळाचे सरवेस्थापक गॅव्हीन डायज, म्हायती अधिकारी दीपक नार्वेकार आनी किंग मोमो फेड्रीक दा कोस्ता हजर आशिल्ले. ह्या वेळार कार्नावालाचो मास्कोट कोंब्याचें अनावरण जालें.
येवपी शुक्रारा पर्वरे कार्निवलाचें कर्टन रेसर सुवाळो जावन अधिकृत रितीन कार्नावालाक सुरवात जातली. उपरांत, १४ फेब्रुवारीक पणजी, १५ फेब्रुवारी मडगांव, १६ फेब्रुवारीक वास्को आनी निमणी कार्नावालाची परेड म्हापशें आनी पणजे १७ फेब्रुवारीक जातली, अशें आरोलकार हांणी सांगलें.
कार्नावाल मनोवपा खातीर इनामाचो खर्च ४८ लाख आनी साधन सुविधांचो खर्च १.०४ कोटी इतलो आसा. तातूंतलो पर्वरे खातीर १९ लाख, मोरजी १६ लाख, पणजी, मडगांव, वास्को आनी म्हापशें कार्नावाल समिती खातीर आमी २९ लाखांची तरतुद केल्या, अशी म्हायती आरोलकार हांणी दिली.
अंदूंच्या कार्नावालांत गोंयच्या दायजाचें दर्शन घडटलें. कोंबों हो कार्निवलाचो मास्कोट आसा आनी हो गांवागिर्या वाठारांनी तशेंच घरा वयर कुरवां म्हण दिश्टी पडटा. तशेंच किंग मोमोचो गावन हे कुणबी साडयेन तयार केला आनी हें कुणबी कापड नीज गोंयकारांची वळख जावन आसा. तशेंच किंग मोमे परेडींत घुमट वाजयत भोवतलो, अशें किंग मोमो फेड्रीक दा कोस्ता हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
