भांगरभूंय | प्रतिनिधी
तेहरानः मध्य उदेंतांतलो तणाव आनी अमेरिकेन होर्मुझ समुद्रधुनीक आडावपाची भिरांत सयत ह्या सगल्या हुस्क्याच्या घडणुकां मदीं भारता खातीर कांय थाकाय दिवपी खबर आसा. भारता कडेन इराणाचे बरे संबंद आसात. देखून भारतीय बोटींक होर्मुझांतल्यान सुरक्षीत वाट दितले अशें भारतांतले इराणी राजदूत मोहम्मद फतहली हांणी स्पश्ट केलां. होर्मुज हुंपतना भारतीय बोटींक कसलोच त्रास जावचो ना अशें आश्वासन इराणी राजदूतान दिल्या.
अमेरिके आनी इराण हांचे मदल्या तणावाचो परिणाम संवसारीक तेल येरादारीचेर जाला. तेलाचे दर गगनालागीं पावल्यांत. संवसारांतल्या 20 टक्के तेल आनी सैमीक वायूची येरादारी होर्मुझांतल्यान जाता. भारता खातीरय हो मार्ग खूब म्हत्वाचो. कारण भारतांत येवपी वट्ट तेलांतलें 40 टक्के तेल होरमुजांतल्यान येता. झुजाचो परिणाम होर्मुझ मार्गांतल्यान जहाज येरादारीचेर जाला. हाका लागून जायत्या देशांनी तेलाचे दर वाडल्यात. हाका लागून हुस्को वाडला.
अमेरिकेची तयारी होर्मुझाचेर आडावपाची तयारी करता आसतना इराणान भारताक सुटका दिल्या. भारतीय बोटी सुरक्षीतपणान होर्मुझांतल्यान भायर सरतलीं अशें आश्वासन इराणान दिल्या. संवसारीक पांवड्यार कितलोय तणाव वाडलो तरी इराण भारता कडेन समतोल संबंद दवरतलो असो स्पश्ट संकेत इराणान दिला.
फाटल्या देड म्हयन्यांत तेलाचे दर मळबाक तेकल्यांत. हाका लागून अमेरिकेन इराणी तेलाचेर आशिल्लीं बंदी काडल्या. ही बंदी तात्पुरती काडून उडयल्या. हाचे उपरांत भारतान इराणा कडल्यान तेल विकतें घेवपाक सुरवात केल्या. सात वर्सांत पयलेच खेपे भारतान इराणा कडल्यान तेल विकतें घेवपाक सुरवात केल्या. हे परिस्थितींत होर्मुज उक्तो उरप हें भारता खातीर खूब म्हत्वाचें.
झुज सुरू जाले उपरांत भारतान इराणाक खूब आदार केला. सरकारान वैजकी पुरवण आनी वखदां धाडलीं. देशभरांतल्या नागरिकांनी खास करून जम्मू-काश्मीर आनी कारगिलांतल्या लोकांनी इराणाक मोलादीक मजत केली. ते खातीर इराणान भारतीय नागरिकांचे उपकार मानल्यात.
‘इराणाक मजत केल्यार गंभीर परिणाम’- ट्रम्प
हालींच स सप्तकांचो संघर्श जाले उपरांत अमेरिके आनी इराण हांचे मदीं तात्पुरतो झुजबंदी जाली. पूण इस्लामाबादांत शांततायेची उलोवणी जाले तरी दोनूय देशांत कायमस्वरूपी कबलात जावंक नाशिल्ल्यान नव्यान तणावाची शक्यताय वाडली. त्याच वेळार चीन फुडाराक इराणाक हवाई संरक्षण प्रणाली सारकिल्लीं शस्त्रां पुरवण करूंक शकता असो दुबाव अमेरिकेच्या गुप्तचर संस्थांक आसा चीन तिसऱ्या देशांतल्यान ह्यो पुरवण करूंक शकता. हाचेर प्रतिक्रिया दितना ट्रम्प हांणी म्हणलें, अशें जालें जाल्यार ताचे चीनाचेर गंभीर परिणाम जातले.
होर्मुझाचेर नाकाबंदी ‘इराणी बंदरांतल्यान आनी दर्यादेगेवयल्या वाठारांतल्यान येवपी-वचपी सगल्या राश्ट्रांच्या बोटींक निपक्षपातीपणान लागू जातली, तातूंत अरबी आखात आनी ओमानाच्या आखातांतल्या सगल्या इराणी बंदरां सयत.” त्याच वेळार सेंटकॉम बिगर इराणी बंदरांक भेट दिवपा खातीर होर्मुझ सामुद्रधुनीचो वापर करपी जहाजांक आडावचे ना. म्हणजेच हेर राश्ट्रांच्या वेपारी बोटींच्या हालचालीचेर कसलेच निर्बंध घालचे नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
