भांगरभूंय | प्रतिनिधी
टायगर राजासिंग : कुडचड्यार गीता जयंती निमतान शौर्य यात्रा
कुडचडे : देशाच्या रक्षणा खातीर दरेका हिंदुची भावना आसपाक जाय. आपलें रक्षण करपाक तशेंच हिंदुचेर जेन्ना जेन्ना अन्याय जाता तेन्ना ताका फुडो करपा खातीर ती आसपाक जाय. आयज कितल्याश्याच घरांनी रामायण, भगवतगीता पुस्तकां पळोवपाक मेळनात, हें आमचें दुर्भाग्य. स्कुलांनी पुस्तकां दिवपाक गेल्यार ताका विरोध कित्याक जाता? जाच्या मनांत हिंदुत्वाचो अभिमान ना तो फुडें कितें करतलो? हिंदुंनी संघटीत जावन हिंदू रक्षणा खातीर लढपाक जाय, अशें टायगर राजासिंग हांणी सांगलें.
गीता जयंती निमतान विश्व हिंदू परिशद, बजरंग दल हांच्या जोड पालवान कुडचड्यार मार्केटा मुखार आयतारा विराट शौर्य संचलन केलें. तिस्क सांवड्डें सावन सुमार 2800 गणभेस घाल्ले बजरंग दलाच्या कार्यकर्त्यां सयत सुमार 12 हजार लोकांची हे कार्यावळींत उपस्थिती आशिल्ली. परंपरीक दिवली पेटोवन ‘हो जाओ तैयार साथियो हो जाओ तैयार’ ह्या गितान तशेंच गोंयांतली हिंदू संस्कृती शिगम्यांतलें रोमटामेळ तशेंच ढोल ताशांच्या गजरांत कार्यावळीची सुरवात जाली. ह्या वेळार टायगर राजासिंग उलयताले. तांचे वांगडा राजेंद्र पवार, मोहन आमशेंकार, संकेत आर्सेकार आनी हेर मानेस्त हाजीर आशिल्ले. भगवतगीता पुजन केले उपरांत दंड आनी तरसाद प्रशिक्षीत प्रयोग केले.
जेन्ना धर्मांतर जातालें तेन्ना तें आडावपाचें काम छत्रपती शिवाजी महाराज हांणी केलें. ते आमचें दैवत. आयजूय धर्मांतरणाचें काम चालूच आसा. शिवाजी महाराज नाशिल्ले जाल्यार ही चळवळ जावचीच नाशिल्ली. आयज बजरंग दल ही चळवळ मुखार व्हरता. गोमातेच्या रक्षणा खातीर हिंदुंनी फुडाकार घेवपाक जाय. पयलीं हिंदू जायात, मागीर राजकारणी जायात. धर्माचे रक्षण करपाक जाय जाल्यार विश्व हिंदू परिशदेंत वांटेकार जायात. भारताचे इस्लामीकरण आडावपाची आयज गरज आसा, ते खातीर हिंदुंनी एकठाय येवपाक जाय, अशेंय टायगर राजा सिंग हांणी म्हणलें.
ह्या वळार हेर मानेस्तांचीय हिंदू धर्माच्या रक्षणा विशीं भाशणां जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
