भांगरभूंय | प्रतिनिधी
5 तारखेक सी कॅथेड्रल सावन कूड हाडटले बॅसिलिकांत
पणजी : सेंट फ्रान्सीस झेवियर हांच्या पवित्र कुडीच्या दर्शनाचो 4 जानेवारी हो निमाणो दीस आसतलो. आनीक दोन दीस उरिल्ल्यान दर्शना खातीरची गर्दी वाडल्या. 5 जानेवारीक सकाळीं 9.30 वरांचेर सेंट फ्रान्सीस झेवियराची पवित्र कूड सी कॅथेड्रल चर्चीतल्यान मिरवणुकीन बॅसिलिकांत हाडटले. हाचे उपरांत प्रार्थना सभा जातली. आर्चबिशप फिलीप नेरी फेर्रांव हांच्या फुडारपणा खाला प्रार्थना सभा जातली, अशी म्हायती फादर हेन्री फाल्कांव हांणी दिली.
सेंट फ्रान्सीस झेवियर हांच्या पवीत्र कुडीच्या दर्शनाक 21 नोव्हेंबराक सुरवात जाल्ली. दरेकी धा वर्सांनी जावपी हो सुवाळो आतां निमाण्या पांवड्यार पावला.
नातलां पयलीं सकाळीं 7 ते सांजे 6 मेरेन कूड दर्शनाचो वेळ आशिल्लो. गर्दी वाडिल्ल्यान नातलां उपरांत कूड दर्शना खातीरचो वेळ दोन वरां वाडयलो आतां सकाळीं 6 ते सांजे 7 वरां मेरेन वेळ आसा. गर्दी वाडिल्ल्यान भाविकांचेर नियंत्रण दवरपा खातीर पुलिसांक सर्कस करची पडटा, अशें फादर हेन्री फाल्कांव हांणी सांगलें. सेंट फ्रान्सीस झेवियर हांच्या पवित्र कुडीचें दर्शन घेवप सगल्यांक शक्य जावचें, म्हूण सरकार आनी प्रशासनान योग्य ती वेवस्था केल्या. कूडदर्शना खातीरची वेवस्था तशेंच मुळाव्यो सुविधा तयार केल्ल्यान कोणाची कसलीच गैरसोय जायना. मुळाव्या सुविधांची सगलयांनी तोखणाय केल्या.
नातलां मेरेन दिसाक 30 ते 40 हजार लोक दर्शन घेताले. नातलां उपरांत गर्दी वाडपाक लागली. आतां दिसाक दोन लाख लोक दर्शन घेतात. हातूंत विदेशी पर्यटक आसात. नव्या वर्साक लागून देशी, विदेशी पर्यटकांची गर्दी वाडल्या. हातूत वीलचेर आनी रावपा खातीरची वेवस्था आशिल्ल्यान गर्दी वाडपाक मजत जाली, अशी म्हायती चर्ची कडल्यान मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
