भांगरभूंय | प्रतिनिधी
फोंड्यां वार्तालाप कार्यावळींत श्रीपाद नायक हांचें सांगणें
भ्रश्टाचार, असमानताय आनी अन्याय ह्या सारक्या समाजीक समस्यांचेर उजवाड घालून प्रसारमाध्यमां बदला खातीर स्फूर्त दिवपी थारूंक शकतात. तातूंत जनमत संकलीत करपाची आनी सामुहीक कृती घडोवन हाडपाची शक्त प्रसारमाध्यमां कडेन आसा. जाका लागून ह्या समस्यांचे निराकरण करपा खातीर सरकाराचेर चेपण येता. सोद पत्रकारिते वरवीं लोकांचे लक्ष ओडून घेवपी मुद्दे उजवाडांत हाडटात. ताका लागून खंयच्याय सरकाराक गुप्ततायेन कार्य करप घातक जायत आशिल्ल्याचें केंद्रीय मंत्री श्रीपाद नायक हांणी उलोवप केलें.
फोंड्यां भारत सरकाराच्या पत्र सुचना कचेरे वतीन फोंडें म्हालांतल्या पत्रकारां खातीर आयोजीत केल्ल्या वार्तालाप हे कार्यावळींत केंद्रीय मंत्री श्रीपाद नायक उलयताले. ह्या वेळार माचयेर गौतम एस. कुमार, निकिता जोशी आनी पत्रकार नरेश गावणेंकार हाजीर आशिल्ले.
लोकांचे ह क्क, जबाबदाऱ्यो आनी सरकारच्या कामकाजा विशीं शिक्षीत करपाक प्रसारमाध्यमां म्हत्वाची भुमिका वठयतात. नागरिकांक विवीध दृश्टीकोन आनी सर्व समावेशक विश्लेशण दिवन पूर्ण म्हायती दितात. लोकांचे दोळे आनी कान म्हूण काम करतना प्रसारमाध्यमां सरकाराचे कामगिरीचेर आनी कृतींचेर लक्ष दवरतात. जेन्ना सरकारांतलीं उत्तरदायित्वाची यंत्रणा उणी पडटा तेन्ना माध्यमांची छाननी सत्तेंत आशिल्ल्यांक तांचे कृती खातीर जापसालदार धरपा खातीर एक शक्तिशाली साधन जायत आशिल्ल्याचें केंद्रीय मंत्री श्रीपाद नायक हांणी म्हणलें.
केंद्रीय मंत्री श्रीपाद नायक हांचे हस्तुकीं दिवली पेटोवन कार्यावळीची सुरवात केली. गौतम कुमार हांणी येवकार आनी प्रास्तावीक केलें. रियाझ बानू हांणी सगल्यांचे उपकार मानले. कार्यावळीचें सुत्रसंचालन पत्रकार नरेंद्र तारी हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
