भांगरभूंय | प्रतिनिधी
गोमंतक ऊस उत्पादक संघटणा
फोंडें, प्रतिनिधी ः संजीवनी साकर कारखानो संबंदीचें ठोस धोरण सरकारान आजून जाहीर करूंक ना. ऊस उत्पादकांक 5 वर्सां अनुदान दिवपाचें उतर सरकारान पाळ्ळें. पूण धोरण जाहीर करूंक ना. ऊस उत्पादकांच्या फायद्या खातीर कारखानो सुरू जायसर सरकारान अनुदान चालू दवरचें अशी मागणी गोमंतक ऊस उत्पादक संघटणेन केल्या.
मंगळारा सकाळीं ऊस उत्पादकांनी ह्या विशयाचेर चर्चा करपा खातीर बसका घेतले उपरांत अध्यक्ष राजेंद्र देसाय हांणी चड म्हायती दितना कारखानो बंद करचे पयलीं नवो कारखानो उबारपाचें उतर सरकारान दिल्लें. पूण 5 वर्सां उपरांत लेगीत कारखानो सुरू करपाक सरकार अपेस आयलां. अंदूं अनुदानाची मुजत सोंपता. पूण सरकारान कारखानो सुरू जाय मेरेन अनुदान चालू दवरपाचो निर्णय ऊस उत्पादकांनी घेतलां. हें संबंदी मुख्यमंत्री डॉ. प्रमोद सावंत हांकां मेळून निवेदन दितले अशें तांणी सांगलें. उपाध्यक्ष हर्षद प्रभुदेसाय, फ्रान्सीस मास्कारेन्हास आनी हेर ऊस उत्पादक हे बसकेंत हाजीर आशिल्ले.
डॉ. सावंत हांणी ऊस उत्पादकांक इथेनॉल प्रकल्प सुरू करपा खातीर कंपनी घेवन येवपाची विनंती केल्ली. ते प्रमाण ऊस उत्पादकांनी एका व्हड कंपनीच्या मालका कडल्यान सरकाराक प्रस्ताव दिल्लो. त्या कंपनी कडल्यान राज्य सरकाराक दर वर्सा १ कोटी 25 लाख रुपया मेळपाचे आशिल्ले. पूण सरकारान आजून तो प्रस्ताव मान्य करूंक ना. सरकारान ऊस उत्पादकांची फटवणूक करची न्हय अशें आवाहन राजेंद्र देसाय हांणी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
