भांगरभूंय | प्रतिनिधी
पणजी ः पाकिस्तानांत जल्मल्ले आनी गोंयांत रावपी शेन सॅबेस्तियान परेरा हांकां सीएए कायद्या खाला भारतीय नागरिकत्व मेळ्ळें. हाचे पयलीं १९६१ वर्सा आदीं ते शिक्षण घेवपा खातीर पाकिस्तानांत गेल्ले. मुळ गोंयचे कासावलीचे जोसेफ फ्रान्सीस परेरा हांकां भारतीय नागरीकत्व मेळ्ळां. फ्रान्सिस हें नागरीकत्व दुरुस्ती कायद्या खाला नागरीकत्व मेळिल्ले गोंयचे पयले नागरीक. ते उपरांत आतां शेन सॅबेस्तीयन परेरा हांकां सीएए कायद्या खाला भारतीय नागरीकत्व मेळ्ळां.
भारतीय संसदेन डिसेंबर 2019 वर्सा नागरिकत्व दुरुस्ती कायदो म्हणल्यार सीएए मान्य केल्लो, पूण तो चालीक लावंक नाशिल्लो. मार्च 2024 वर्सा तो कायद्यांत रुपांतर जालो. नागरीकत्व दुरुस्ती कायद्याक (सीएए) लागून 31 डिसेंबर 2014 पयलीं भारतांत स्थलांतरीत जाल्ल्या पाकिस्तान, बांगलादेश आनी अफगाणिस्तानांतल्या हिंदू, बौद्ध, जैन, पारसी, शीख आनी क्रिस्तांवांक भारतीय नागरीकत्व घेवपाक मेळटा.
‘’भारतीय नागरीकत्व मेळिल्ल्यान म्हाका खूब खोस जाल्या. आतां म्हाका नोकरी करप शक्य जातलें’ अशीं भावना शेन सॅबेस्तीयन परेरा हांणी प्रसार माध्यमां कडेन उक्तायली.
सीएए कायद्याक लागून परेरा प्रमाण गोंयांतल्या आनी देशांतल्या जायत्या लोकांक फायदो जातलो. सीएए कायद्या खातीर प्रधानमंत्री नरेंद्र मोदी आनी केंद्रीय गृहमंत्री अमित शाह हांचें उपकार मानतां अशी प्रतिक्रिया मुख्यमंत्री डॉ. प्रमोद सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
