शिक्षकाक थापट भुजलें
भांगरभूंय | प्रतिनिधी
फोंडें, प्रतिनिधी : कुर्टी – फोंडेंच्या केंद्रीय विद्यालयांत तिडकल्ल्या एका ज्येश्ठ शिक्षकान आठवेच्या विद्यार्थ्याक बरोच पेटिल्ल्यान ताका हॉस्टिपलांत दाखल करचें पडलें. ह्या प्रकरणांत केदारनाथ राम ह्या शिक्षकाक फोंडें पुलिसांनी ताब्यांत घेतला. ही घडणुक मंगळारा दनपरां घडली.
हे विशीं चड म्हायती प्रमाण, केदारनाथ ह्या शिक्षकाच्या पॅन्टीक कितें तरी लागिल्लें. हें त्या विद्यार्थ्यान शिक्षकाक दाखोवन दिले उपरांत शिक्षक विद्यार्थ्याचेर बरोच तिडकलो आनी नेटान ताणे विद्यार्थ्याचेर एक फुलयलें. थापट मारतांच विद्यार्थी वचून फळ्याक आपटलो आनी रगत आयलें. इतलें जावनूय विद्यार्थ्याच्या पालकांक हे विशीं कांयच सांगूंक ना.
ही घडणूक घडली तेन्ना विद्यालयाची प्राचार्य थंय नाशिल्ली. तशेंच कसलेच तरेची भलायकी सुविधाय उपलब्ध नाशिल्ली. हे विशीं विद्यार्थ्याच्या पालकांक उसरां म्हायती मेळटांच तांणी ताका फोंडें आयडी उपजिल्हो हॉस्पिटलांत व्हरून ताची वैजकी तपासणी करून उपचार केले. वर्गांतल्या हेर विद्यार्थ्यांनीय आपल्या सहकारी विद्यार्थाची कांयच चूक नाशिल्ल्याचें सांगलें. सध्या हो विद्यार्थी वैजकी निरिक्षणा खाला आसा. हे विशीं पुलीस तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
