भांगरभूंय | प्रतिनिधी
विद्यार्थी मंडळ पदग्रहण सुवाळो
पणजी : विद्यापीठ हें ज्ञान मेळोवपाचें, करियर घडोवपाचें केंद्र. हांगा फुडले पिळगेक योग्य आकार दितात. हांगा द्वेश, पूर्वग्रह, भेदभाव पसरावपी भास आसपाक जायना असो सल्लो विरोधीपक्ष फुडारी युरी आलेमाव हांणी दिलो. मंगळारा विद्यापीठ विद्यार्थी मंडळाच्या पदग्रहण सुवाळ्याक ते उलयताले.
ह्या वेळार आमदार कार्लोस फेरेरा, कुलगुरू हरिलाल मेनन, रजिस्ट्रार सुंदर धुरी, सोहम राऊत, श्रुती पवार, साई देसाय आनी हेर नवनियुक्त प्रतिनिधी आशिल्ले.
नव्या विद्यार्थी मंडळाकडेन कालावधी उणो आसा. जरी अशें आसलें तरी तांणी विद्यार्थ्यांच्या प्रस्नांक प्राधान्य दिवपाक जाय. तशेंच तांकां समाजीक, नागरी प्रस्नांची म्हायती आसप गरजेचें. संविधानान दरेकल्याक आपलें मत मांडपाचो अधिकार दिला. विद्यार्थ्यांनी अन्याया आड आवाज काडपाक जाय. तातूंत शास्त्रीय नदर आसप गरजेचें. विद्यार्थ्यांनी ज्ञाना सयत नवीन कुशळटाय आत्मसात करची, अशें युरी हांणी म्हणलें.
कार्लोस फेरेरा हांणी, हांव गोंय विद्यापीठाच्या पयल्या बॅचचो विद्यार्थी आशिल्लो. गोंय विद्यापीठांतले खुबशे आदले विद्यार्थी आयज व्हड पदार काम करतात. विद्यार्थ्यांनी आपली आवड आसा त्या मळार काम करून उत्कृश्ठ जावपाक यत्न करचे. विद्यार्थी मंडळांत वेंचून आयिल्ल्यांक सगल्यांची मतां मेळूंक नासतलीं. तरी तांणी पुराय विद्यार्थी समुदाया खातीर काम करचें. हे खातीर खंयचे गजालीक प्राधान्य दिवप हें तांणी थारावचें अशें तांणी सांगलें.
स्वातंत्र्य आनी शिस्त एकठांय आसप गरजेचें
मेनन हांणी, देशांत हेर विद्यापिठांचे तुळेंत गोंय विद्यापीठांत थारिल्ल्या वेळार विद्यार्थी मंडळाच्यो वेंचणुको जातात. नवनियुक्त मंडळान आपल्या अधिकारांचो वापर करून विद्यार्थ्यां खातीर काम करचें. अधिकारा वांगडा जापसालदारी येता हेंय लषांत दवरचें. स्वातंत्र्या वांगडा शिस्त आसप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
