भांगरभूंय | प्रतिनिधी
नवी दिल्ली, खबरां संस्था ः केंद्रीय पर्यावरण, रानां आनी हवामान बदल मंत्रालयान विदेशी पाळीव रानवटी जनावरांचो ताबो घेवप आनी तांका पोसप हें संबंदी नेम अधिसुचित केल्यात. हे नेम रानवटी संरक्षण कायदो, 1972 च्या कलम 49 एम खाला तयार केल्यात. ते प्रमाण रानवटी संरक्षण कायद्याच्या 4 श्रेणीत ‘सायटीस’ खाला संरक्षण दिल्ले जनावर जर पोसतात जाल्यार तांची नोंदणी करप सक्तीचें आसा.
‘रानवटी जनावर संरक्षण कायद्यांत’ 2023 वर्सा दुरुस्ती केल्ली. ते प्रमाण ‘सायटीस’ खाला पयल्या श्रेणीत संरक्षित केल्ल्या विदेशी रानवटी जनावरांचो कायद्याच्या 4 श्रेणीत आस्पाव केलो. संयुक्त राश्ट्रांच्या ‘आययूसीएन’ हे परिशदेन 1963 वर्सा ‘सायटीस’ ची स्थापणूक केली. 1973 वर्सा भारता सयत 80 देशांनी रानवटी जनावर तस्करी विशींच्या ‘सायटीस’ नियमांक मान्यताय दिवन परिशदेचें वांगडीपण मान्य केलें. मजगतीं, खंयच्याय धोक्यांत आशिल्ल्या विदेशी जनावराची तस्करी करप सायटीसच्या नेमा प्रमाण सक्तीचें आसा. हे खातीर ‘सायटीसी’ हातूंत वेगवेगळे वर्ग तयार केल्यात आनी धोक्यांत आशिल्ल्या विदेशी रानवटी जनावरांचो पयल्या वर्गांत आस्पाव केला.
केंद्रीय पर्यावरण मंत्रालयान ‘लिव्हिंग अॅनिमल स्पिसीज (रिपोर्टिग अॅण्ड रजिस्ट्रेशन) नेम’, 2024 हो नेम अधिसुचित केला. नव्या नेमा प्रमाण भारतांतल्या खंयच्याय मनशान वा संघटनेन ‘सायटीस’ च्या पयल्या वर्गा खाला संरक्षित आशिल्ले विदेशी जनावर पोसल्यात जाल्यार तांची नोंदणी करप सक्तीचें आसा. तशेंच ही नोंदणी 28 फेब्रुवारी 2024 सावन फुडल्या 6 म्हयन्यां भितर करप सक्तीचें आसा. परिवेश 2.0 पोर्टला वरवीं ही नोंदणी करूं येता. ते उपरांत फुडल्या 30 दिसां भितर संबंदीत राज्याच्या मुखेल रान संरक्षकाक पर्यावरण पोर्टला वरवींच कळोवप सक्तीचें आसतलें. तशेंच ह्या विदेशी रानवटी जनावरांचें हस्तांतरण, तांका मरण आयलें वा पिलां जाली जाल्यार हाचेय परिवेश पोर्टलांत नोंदणी करप सक्तीचें आसतलें. ह्या नव्या नेमाक लागून विदेशी जनावरांचें हस्तांतरण आनी जल्म आनी मरण हांची नोंद दवरपाक मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
