लोकशायेंत जनता सर्वश्रेश्ठ

भांगरभूंय | प्रतिनिधी

श्रीधरन पिल्लई: सत्तरी म्हालांतले सरपंच, पंच हांचे कडेन सादलो थेट संवाद

वाळपय: लोकशायेंत जनता सर्वश्रेश्ठ आसता. लोकांच्यो समस्या समजून घेवन त्यो सरकारा वतीन सोडोवपाचो यत्न करप सामकें गरजेचें आसा. गांवगिऱ्या वाठारांतल्यो समस्या हे विशींचो अणभव घेवन त्यो सरकारा मेरेन पावोवपाचें काम आपूण फाटल्या स म्हयन्या सावन करीत आसा. ‘गोवा संपर्क यात्रा’ माध्यमांतल्यान फाटल्या स म्हयन्यांत 220 गांवांक भेटी दिल्यो. हाका लागून 60 टक्के वाठारांनी यात्रा पूर्ण जाली. फुडल्या स म्हयन्यांत गोंयांतल्या सगल्या गांवांक भेटी दिवपाचो संकल्प पुराय करतलों. राजभवनाचो निधी हो लोकांच्या सूख दुख्खा खातीर वापतरले अशें उलोवप गोंयचे राज्यपाल पीएस श्रीधरन पिल्लई हांणी केलें.

सत्तरी म्हालांत नव्यान वेंचून आयिल्ले सरपंच, पंच हांचे कडेन वाळपय आयोजीत केल्ल्या संवादाचे कार्यावळींत ते उलयताले. ह्या वेळार सत्तरी म्हालांतले सरपंच, पंच हांची व्हड प्रमाणांत हाजेरी आशिल्ली.

माचयेर पर्यें मतदारसंघाची आमदार आनी गोंय रान उदरगत म्हामंडळाची अध्यक्ष डॉ. दिव्या राणे, वाळपयच्यो नगराध्यक्षा सेहझीन शेख, उपनगराध्यक्ष अनील काटकार, अतिरिक्त जिल्होधिकारी संजीव देसाय, राज्यपालांचे खास सचीव मिहीर वर्धन, सत्तरी म्हालाचे उपजिल्होधिकारी प्रवीण परब, गटविकास अधिकारी सूर्याजीराव राणे आनी कार्यावळीचे संयोजक विनोद शिंदे हांची खासा हाजेरी आशिल्ली.

मुखार उलयतना पिल्लई हांणी सांगलें, समाजाच्या विकासांत पंचायत हो म्हत्वाचो घटक आसता. पंचायत माध्यमांतल्यान वाठाराचो सर्वांगी विकासाक चालना दिवप शक्य आसा. हे खातीर दरेक सरपंच आनी पंच वांगड्यांनी सक्रीय आसप गरजेचें आसा.

सत्तरी म्हालाच्या सर्वांगी विकासाचे बाबतींत प्रतापसिंह राणे हांचें योगदान म्हत्वाचें आसा. ते आदर्श राजकारणी आसात. तांणी आतां मेरेन आपलें राजकारण हे समाजा खातीर समर्पीत केलां. हाका लागून तांचो आदर्श दवरप हें सामकें गरजेचें आसा. विश्वजीत राणे हांणी लोकांचें लोकप्रतिनिधी म्हूण आपलें स्थान सिद्ध केलां. पर्यें मतदारसंघाची आमदार डॉ. दिव्या राणे हांणी लेगीत आपल्या ल्हानशा कार्यकाळांत लोकां कडेन आपली नाळ जोडून घेतल्या. लोकांचे समस्ये कडेन त्यो एकरूप जातात. हे खातीर आयज लोकांच्यो समस्या तांकां सविस्तरपणान खबर आसा. ज्यो कितें समस्या आसात त्यो सोडोवपाचे नदरेंतल्यान आपूण प्रामाणीक यत्न करतलों अशें राज्यपाल पिल्लई हांणी म्हणलें.

गोंयचो राज्यपाल म्हूण जापसालदारकी स्विकारले उपरांत राजभावनाचो निधी लोकां खातीर वापरपाचो निर्णय आपणें घेतला आनी आतां मेरेन डायलिसीस दुयेंती आनी कांक्र दुयेंती हांचे खातीर व्हड प्रमाणांत आपणें खर्च केला. 220 जाणांक हाचो आतां मेरेन फायदो जाला. जाल्यार समाजाच्यो अडचणी पयस करपा खातीर कार्यरत आशिल्ल्या समाजसेवी संस्थां खातीर राजभावनाचो निधी दिला. हाचो आतां मेरेन 71 समाजसेवी संस्थांक फायदो जाल्ल्याचें पिल्लई हांणी सांगलें.

ह्या वेळार सत्तरी म्हालांतल्या डायलिसीस दुयेंतींक राज्यपालांचे हस्तुकीं राजभवन निधींतल्यान अर्थीक धनादेश भेटयलो. हातूंत जुबेदा शेख, संतोष गांवस, चंद्रकांत पार्सेकार आनी गोपाळकृष्ण पर्येंकार हांचो खास करून आस्पाव आसा.

मजगतीं, आपले मनोगत उक्तायतना आमदार डॉ. दिव्या राणे हांणी राज्यपालांक येवकार दिलो. सत्तरी भूंय ही देव देवतांची भूंय आसा. सैमान सत्तरी म्हालाक व्हड प्रमाणांत योगदान दिलां. ह्या सैमाच्या माध्यमांतल्यान ह्या वाठारांतल्या लोकांक स्वावलंबी करपाचे नदरेंतल्यान यत्न करतले. हे खातीर वेगळ्यावेगळ्या पांवड्यार प्रकल्प हाडपाचो आपलो विचार आसून ते विशींचे यत्न सुरू आशिल्ल्याचें तांणी सांगलें.

सुरवेक माचयेर हाजीर आशिल्ल्या मानेस्तांक फुलांतुरे भेटोवन येवकार दिलो. नगरगांव सरकारी माध्यमीक विद्यालयाच्या विद्यार्थ्यांनी सादर केल्ल्या येवकार गितान आनी राष्ट्रगितान कार्यावळीची सुरवात जाली. निमाणें राष्ट्रगितान कार्यावळीची सांगता जाली.