भांगरभूंय | प्रतिनिधी
दामोदर शिरोडकार: पालिकेंत पार्कींग प्लाझाचोच निर्णय जाला
मडगांव: मडगांवच्या पार्कींग प्रकल्पांत रॅस्टोरंण्ट येता हें म्हाका खबर ना. आमदार दिगंबर कामत हांणी तशें कितेंय सांगिल्लें आसत जाल्यार हे विशीं तांकांच विचारल्यार बरें. पालिकेन फक्त पार्कींग प्लाझा प्रकल्प उबारपा खातीरचो थाराव घेवन बांदकामा खातीर जीसुडा कडेन दिला अशें मडगांवचे नगराध्यक्ष दामोदर शिरोडकार हांणी सांगलें.
मडगांवच्या भोवमजली पार्कींग प्रकल्पाचे इमारतींत रॅस्टोरंण्ट आयल्यार पालिकेक महसूल मेळटलो अशें आमदार दिगंबर कामत हांणी म्हणिल्लें. ह्या उलोवपा उपरांत पालिकेच्या दोन आदल्या नगराध्यक्षांनी रॅस्टोरंण्टाची गरज ना. मडगांवच्या लोकांक वाहनां पार्क करपा खातीर सुवात नाशिल्ल्यान त्रास जाता. ते खातीर पार्कींग प्रकल्पाचीच उबारणी जावची. सुवात आसल्यार पालिकेचीं कागदपत्रां दवरपा खातीर पर्यायी वेवस्था करची अशें मत उक्तायलें.
हाचेर नगराध्यक्ष दामोदर शिरोडकार हांकां पत्रकारांनी विचारलें तेन्ना, पार्कींग प्लाझा उबारपाचो निर्णय मडगांव पालिका मंडळान घेतिल्लो. तातूंत रॅस्टोरंण्ट उबारपाचो निर्णय आपणें तरी घेतिल्लो ना. पार्कींग प्रकल्पाचें काम जीसुडा कडेन दिलां. पालिके कडल्यान पयशे लेगीत जीसुडा कडेन जमा केल्यात.
आमदार दिगंबर कामत हांणी कितेंय सांगिल्लें आसत जाल्यार तांकांच विचारिल्लें बरें. रॅस्टोरंण्टा खातीर कसलोय प्रस्ताव आयिल्लो आसल्यार ते विशीं विचारपूस करतले. आपणाक तरी हातूंतलें कांयच खबर ना. कसलोय प्रस्ताव आयल्यार ताचेर पालिका मंडळाचे बसकेंत चर्चा जातली आनी उपरांतूच फुडलो निर्णय जातलो अशें शिरोडकार हांणी म्हणलें.
रॅस्टोरंण्ट आयल्यार बरें जातलें काय ना हे विशीं ते बांदपाचो निर्णय जावंक नाशिल्ल्यान हांव कांयच सांगूंक शकना अशेंय दामोदर शिरोडकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
