भांगरभूंय | प्रतिनिधी
कर्मचारी भरती आयोगा कडल्यान खात्यांक आदेश
पणजी : अनुकंपा तत्वाचेर भरपाचे जागे आनी सुटके झुजार्यांच्या भुरग्यां खातीर आशिल्ल्यो कोट्यांतल्यो सुवातो सोडल्यार हेर रित्या सुवातांची म्हायती खात्यांनी कर्मचारी भरती आयोगाक कळोवची, असो आदेश आयोगान जारी केला. हे विशीं कर्मचारी भरती आयोगान परिपत्रक जारी केलां.
तशेंच भरती नेम ४ (२) प्रमाण खातें मुखेल्यांनी १ जानेवारी २०२५ ते ३१ जानेवारी २०२५ हे मजतींत फॉर्म १ आनी फॉर्म २च्या स्वरूपांत रित्या सुवातांची म्हायती ऑनलायन स्वरूपांत कळोवची. वेबसायटीचेर फॉर्म १ आनी फॉर्म २ ऑनलायन स्वरूपांत धाडपाची तरतूद केल्या. तशेंच खात्यांनी ह्यान पयलीं कळयिल्ल्या रित्या पदांची म्हायती २०२५ त परत कळोवपाची गरज ना, अशेंय आयोगान स्पश्ट केलां.
कर्मचारी भरती आयोगान एलडीसी आनी ज्युनियर स्टेनोग्राफर पदांचे भरती जायरात दिल्या. ह्या दोनूय पदां खातीरचो अभ्यासक्रमूय जारी केला. एलडीसी आनी ज्युनियर स्टेनोग्राफर पदा खातीर दरेकी ६० गुणांचें सीबीटी- २ आनी सीबीटी – ३ अशे दोन पेपर आसतले. दरेका पेपरा खातीर ७५ मिनटांचो वेळ आसतलो.
एलडीसी खातीर संगणकाच्या ज्ञाना सयत इंग्लिशींतल्यान टायपिंगचीं ३० शब्दां प्रती मिनीट अशी स्पीड गरजेची. ज्युनियर स्टेनोग्राफर पदा खातीर शॉर्ट हँडची प्रती मिनीट १०० शब्दां आनी टायपिंगचीं ३५ शब्दां प्रती मिनीट अशी स्पीड गरजेची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
