भांगरभूंय | प्रतिनिधी
कोरगांव, प्रतिनिधी ः मोलें अभयारण्यांत रान खात्याच्या सातपाल आर्बोरेटमाक भेट दिवपी पर्यटक आनी विद्यार्थ्यां कडल्यान प्रवेश शुल्क घेतात. दर मनशा फाटल्यान 10 रुपया. विद्यार्थ्यां खातीर 5 रुपया आनी बशीच्या फाटल्यान 100 रुपया घेतात. पूण तांकां दिल्ले पावती मदीं भानगडी आशिल्ल्याचें दिसून आयलां.
हे संबंदीं मेळिल्ले म्हायती प्रमाण, कोरगांवच्या श्री कमलेश्वर उच्च माध्यमीक शाळेची तांबडी सुर्ला पिकनीक गेल्ली. उपरांत दनपारच्या वेळार जेवपा खातीर सातपाल आर्बोरेटमांत वचपाक गेलें तेन्ना प्रवेश शुल्क आसा अशें सांगलें. त्या वेळार शाळेच्या शिक्षकांनी 600 रुपया दिवन पावती घेतली. पिकनीक जालें उपरांत सगळे घरां परतले. उपरांत दुसऱ्या दिसा प्रवेश शुल्क दिल्ली पावती ऑफिसांत उगडली तेन्ना ताचेर पावती दिवपी कर्मचाऱ्याची सय वा सरकारी स्टॅम्प नाशिल्ल्याचें दिसून आयलें. तशेंच हे पावतीचेर दोन सुवातेर दोन वेगवेगळे क्रमांक छापिल्ले आशिल्लें. सरकारी कार्यालयांतल्यान कसलीय पावती दितना कार्बन कॉपी काडटात पूण ही पावती दितना तशें करुंक ना. ताका लागून हे पावती आनी प्रवेश शुल्क विशीं भानगड आसा असो दुबाव उक्तायलो. ताका लागून प्रवेश शुल्क महूण घेतिल्ले पयशे सरकाराक जमा जाता कांय पावती दिवपी कर्मचाऱ्याच्या खिशांत वतात असो प्रस्न उप्रासता. ताका लागून रान खात्याच्या वरिश्ठ अधिकाऱ्यांनी हे विशीं चवकशी करून योग्य कारवाय करपाची गरज आसा.
मजगतीं, 24.50 हेक्टर वाठारांत पातळिल्ल्या ह्या आर्बोरेटमांत वेगवेगळ्या झाडांच्यो जाती आशिल्ले 80 परस चड प्लॉट आसात आनी थंय विद्यार्थी वनस्पतशास्त्राचो अभ्यास करपा खातीर तांची म्हायती जाणून घेवपा खातीर भेट दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
