भांगरभूंय | प्रतिनिधी
थळाव्यांच्या वस्तुं खातीर कायम स्वरुपी स्वयंपूर्ण ई- मार्केट
मडगांव, प्रतिनिधी : राज्यांतली जनता उमेदीन जगची, तशेंच सरकाराच्यो सगळ्यो येवजण्यो वेळार सगळ्यांक पावच्यो देखून पंचायत पांवड्यार सगळ्यो येवजण्यो व्हेल्यात. पंचायत पांवड्यार प्रशिक्षणां घेतले, थळाव्यांच्यो वस्तू, खावपाचे जिन्नस ई- मार्केट उपलब्ध कातले. तशेंच वेसन, आत्महत्त्येचें प्रमाण उणें जावन ‘हॅप्पीनेस इंडेक्स’ वाडपा खातीर, दरेकाक काम दिवपाचे यत्न राज्य सरकार करता, अशें मुख्यमंत्री डॉ. प्रमोद सावंत हांणी सांगलें.
मडगांवच्या रवींद्र भवनांत गृह आधारच्या लावार्थ्यांक प्रमाणपत्रां वाटपाचे कार्यावळीचें आयोजन केल्लें. ह्या वेळार तांणी पायांभूत सुविधां सयत मनशाचे उदरगती खातीर सरकार काम करता अशें सांगलें. ह्यान पयलीं १ लाख ३६ हजार बायलांक गृह आधार येवजणेंतल्यान अर्थीक मजत करताले. आतां तातूंत आनीक ११ हजार लाभार्थ्यांची भर जाल्या. सुमार देड लाख कुटुंबीयांक गृहआधार येवजणेचो लाव दिता. दयानंद समाजीक येवजणेंतले देड लाख लाभार्थी आनी गृह आधार येवजणेचे देड लाख अशा तीन लाख कुटुंबांक दर म्हयनो येवजण्यांचे पयशे दितात, अशें डाॅ. सावंत हांणी स्पश्ट केलें.
हॅप्पीनेस इंडेक्स वाडोवपा खातीर यत्न करतना राज्यांतलीं वेसनां उणीं जावचीं, आत्महत्त्येचें प्रमाण उणें करपाचो यत्न आसा. ताका लागून अर्थीक स्वावलंबनाचो मार्ग स्विकारतले. दरेका हाताक काम दिवपाचो यत्न राज्य सरकार करता, अशें तांणी म्हणलें.
चवथ ई- बाजारांतल्यो वस्तू स्विगी वरवीं पावतल्यो घरां मेरेन
गोंय स्वयंपूर्ण जावपा खातीर पंचायत पांवड्यार ‘चवथ ई- बाजार’ सुरू करतले. हाचे वरवीं स्वयंसहाय्य गट, महिला बचत गटांच्या उत्पादनांक मार्केट मेळटलें. चवथी खातीर खावपाचे जिन्नस पंचायत कार्यालयांत उपलब्ध मेळचे आनी ताका लागून बायलांच्या ग्रुपांक स्वयंपूर्ण इश्ट सहकार्य करतले. ‘चवथ ई- बाजार’ ह्या संकेत थळार सगळे जिन्नस आसतले आनी ते खंयच्यानूय विकते घेवं येता. स्विगी वरवीं ते घरा मेरेन पावतले, अशें डॉ. सावंत हांणी सांगलें. परबां खातीर खावपाचे जिन्नस थळाव्या उत्पादकां कडल्यानूच घेवचे अशेंय तांणी फुडें म्हणलें.
गोंयकारांनी एकवटान रावचें : मुख्यमंत्री
राज्यांत विवीध धर्माचे लोक सुखान, उमेदीन रावतात. खंयचीय परब लागीं पावली काय थोडे राज्यांतल्या सर्वधर्मसमभाव विस्कळीत करपाचो यत्न करतात. राज्यांत हिंदू, क्रिस्तांव, मुस्लीम सर्वधर्मीय एकवटान वावुरतात. तेन्ना दोन समाजा मदीं फूट घालपाचो यत्न जावचो न्हय. नवभारत घडयतना स्वयंपूर्ण गोंय करपा खातीर सगळ्यांचें सहकार्य गरजेचें, असो उलो मुख्यमंत्र्यान मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
