भांगरभूंय | प्रतिनिधी
जिएसटी ९.६२, जाल्यार वॅट महसुलांत ६.४१ टक्क्यांनी वाड
पणजी : राज्याची अर्थीक स्थिती दिसान दीस वाडतूच आसा. फाटल्या वर्सा परस अंदूं सरकाराचे तिजोरेंत ३६५.४३ कोटी रूपया चड जमा जाल्यात. फाटल्या वर्सा एप्रिल ते डिसेंबर २०२३ मेरेन तिजोरेंत ४२४९.३४ कोटी रूपया जमा जाल्ले. अंदूं २०२४त एप्रिल ते डिसेंबर मेरेन ४६१४.७७ कोटी रूपया जमा जाल्यात. अंदूंच्या डिसेंबरांत फाटल्या वर्सा परस ७५.५१ कोटी रूपयां चड महसूल जमा जाला. मुख्यमंत्री डॉ. प्रमोद सावंत हांणी ही म्हायती दिली.
जिएसटी, वॅट सयत पर्यटनांतल्यान आयिल्ल्या कराच्याय महसुलाचो हातूंत वाटो आसा. पर्यटकांचो आंकडो वाडिल्ल्यान अर्थवेवस्था बरी जावपाक मजत जाता. राज्याचो जिएसटी महसूल ९ महिन्यांत ९.६२ टकक्यांनी वाडला. कर सुधारणा आनी अर्थीक वेव्हार वाडिल्ल्याचो हो परिणाम.
राज्याचो मोलादीक कर (वॅट) फाटल्या वसारचे तुळेंत ६.४१ टक्क्यांनी वाडला. जिएसटी आनी वॅट एकठांय केल्यार ही वाड ८.६० टक्के जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
