राजेंद्र आर्लेकार हांणी केरळाचे राज्यपाल म्हूण पद स्विकारलें
भांगरभूंय | प्रतिनिधी
तिरुवनंतपुरम, खबरां संस्था ः राजेंद्र विश्वनाथ आर्लेकार हांणी बिरेस्तारा केरळाचे राज्यपाल म्हूण पद स्विकारलें. केरळ उच्च न्यायालयाचे मुखेल न्यायाधीश नितीन मधुकर जमादार हांणी सकाळीं 10.30 वरांचेर राजभवनांत गोपनीयतेचो सोपूत दिलो. ह्या वेळार तांणी खास केरळाचो भेस आशिल्ली लुंगी बांदिल्ली.
मजगतीं, काल आर्लेकार हांणी गोंयचे राज्यपाल पी. एस. श्रीधरन पिल्लय हांकां मेळून वेगवेगळ्या विशयांचेर चर्चा केली. हाचे उपरांत तांणी प्रसार माध्यमां कडेन संवाद सादलो. सांजवेळार ते केरळांतल्या तिरुवअनंतपुरम आंतरराष्ट्रीय विमानतळार देंवले. थंय तांकां केरळाचे मुख्यमंत्री पिनराई विजयन हांणी येवकार दिलो. हाचे उपरांत राजभवनांत पावतकच राज्यपालाचे अतिरिक्त मुखेल सचीव दवेंद्र कुमार धोडावत हांणी तांकां येवकार दिलो.
23 एप्रिल 1954 दिसा जल्मल्ले आर्लेकार गोंयांत भाजपाचे ज्येश्ठ वांगडी जावन आशिल्ले. आर्लेकार हांचो ल्हानपणा सावन राष्ट्रीय स्वयंसेवक संघा कडेन लागींचो संबंद आसा. तांणी 1989 वर्सा भाजपांत प्रवेश केलो. 2002 ते 2007 मेरेन भाजपाचे आमदार आनी 2012 ते 2015 ह्या काळांत गोंय विधानसभेचे अध्यक्षपद तांणी सांबाळ्ळां. ह्या काळांत गोंय विधानसभा अधिवेशनाचें कामकाज पेपरलेस आनी कोंकणींत करपाक तांचो म्हत्वाचो वांटो आशिल्लो. 2015- 17 वर्सा ते गोंयचे पंचायत, रान आनी पर्यावरण मंत्री आशिल्ले. उपरांत तांकां हिमाचल प्रदेशाचे राज्यपाल केले. मागीर तांची बिहाराचे राज्यपाल म्हूण नेमणूक जाली. आनी आतां ते केरळाचे राज्यपाल म्हूण पद सांबाळटले.
सोपूत सुवाळ्याची कांय खिणचित्रा…
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
