भांगरभूंय | प्रतिनिधी
वास्को, प्रतिनिधी: हांगां मे म्हयन्यांत एके बायलेचेर रस्ताद सुण्यान हल्लो केल्लो. तातूंत ती गंभीर जखमी जाल्ली. लोकांनी कागाळ करतकच थळाव्या प्रशासनान रस्ताद सुण्यांचो बंदोबस्त करपाचें आस्वासन दिल्लें. मात ताची अमलबजावणी केली ना. वता थंय रस्ताद सुणे नदरेक पडटात. सुण्यांनी हल्लो करपाच्यो घडणुको आजूनय उण्यो जावंक नात. सुणीं चाविल्ल्यान म्हयन्याक चिखली उपजिल्हो हॉस्पिटलांत उणेच १०० जाण तरी उपचारा खातीर येतात.
सुण्यांची दखल घेवन आमदार दाजी साळकार हांणी बसका घेतिल्ली. रस्ताद सुण्यांचेर नियंत्रण कशें दवरचें हे विशीं चर्चा केल्ली. ह्या वेळार पिपल्स फॉर ऍनिमलच्या प्रतिनिधींनी दिसाक वीस सुण्यांचें निर्बिजिकरण करपाचें आस्वासन दिल्लें. पूण तें जालां काय ना हें आजून कळूंक ना. तांचे कडेन वाहन, चालक, कामगार, निधी आनी हेर जायत्या गजालींचो उणाव आशिल्ल्याचें तांणी चर्चे वेळार स्पश्ट केल्लें.
पाळिल्ल्या सुण्यांची संबंधितांनी मुरगांव पालिकेंत नोंदणी करची. नोंदणी करूंक ना आनी संबंदीत सुणे नदरेक पडल्यार तांकां रस्ताद सुणीं समजुचीं अशें मत गोवा कॅन संस्थेचे समन्वयक रोलंड मार्टिन्स हांणी उक्तायल्लें. हे बसकेंत घेतिल्ल्या निर्णयांची कितली अमलबजावणी जाली हाचो अहवाल घेवपाची गरज आसा. जाका लागून रस्ताद सुण्या संबंदी योग्य नियोजन करपाक मजत जातली, अशी प्रतिक्रिया नागरीक उक्तायतात.
हीं रस्ताद सुणीं सगळे कडेन पंगडांनी रावतात. रातच्या वेळार तीं स्कुटर, वाहनां तशेंच चलून वचप्यांचे फाटीक लागतात. सुण्यांच्या ह्या हल्ल्यान कांय जाण वाटावतात जाल्यार कांय जाणांक जखमी जातात. ताका लागून रातच्या वेळार थळाव्या प्रशासनान भोंवून ह्या सुण्यांचो सर्व्हे केल्यार तांकां ही परिस्थिती कळटली. ह्या रस्ताद सुण्यांचेर उपाय करपाची मागणी लोक करतना दिसतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
